Qaraǵandy oblysynda bir aıda brakonerlerge qarsy on qylmystyq is qozǵaldy

QARAǴANDY. QazAqparat – Qaraǵandy oblysynda polıtseıler «Brakoner» jedel-aldyn alý sharasynyń qorytyndysyn shyǵardy. Shara barysynda balyqshylar men ańshylardyń zańsyz áreketterine qarsy 10 qylmystyq is qozǵalyp, 80-nen astam ákimshilik hattama toltyryldy, dep habarlaıdy QazAqparat tilshisi.

9 tamyz ben 31 tamyz aralyǵynda Qaraǵandy oblysynda «Brakoner» jedel aldyn alý sharasy ótti.

«Osy kezeńde QR QK-niń 335-baby «Balyq resýrstaryn, basqa da sý janýarlaryn nemese ósimdikterin zańsyz aýlaý» boıynsha toǵyz qylmystyq is, QR QK-niń 337-baby «Zańsyz ań aýlaý» boıynsha bir qylmystyq is qozǵaldy. Sonymen qatar, QR QK 383-baby «»Balyq aýlaý jáne balyq resýrstary men basqa da sý janýarlaryn qorǵaý erejelerin buzý» boıynsha 87 ákimshilik hattama toltyryldy», - dep habarlady Qaraǵandy oblysy PD JPQB tabıǵatty qorǵaý polıtsııasy bóliminiń bastyǵy Erbolat Izatov.

29 tamyzda polıtsııa qyzmetkerleri Prıozersk qalasynyń mańynda Balqash kóliniń jaǵasyndaǵy saıajaı massıvinen eki shaqyrym jerde motorly qaıyqty ustady. Onda 38, 42 jáne 47 jastaǵy úsh er adam bolǵan. Olardyń barlyǵy – Prıozersk qalasynyń turǵyndary. Qaıyqtan 160 keli balyq tabylyp, tárkilendi.

Osy kúni Qaraǵandy oblysy Shet aýdanynyń polıtsııa bóliminiń qyzmetkerleri «Qyzylorda-Pavlodar» avtojolynda 60 jastaǵy er adam basqaryp kele jatqan Nıva avtokóligin toqtatty. Kóliktiń júksalǵyshyn tekserý barysynda polıtseıler úrlemeli qaıyqty, bes dana tordy jáne 37 kelige jýyq tuqy tapty.

30 tamyzda Balqash kóliniń Bertis shyǵanaǵynda 26 jastaǵy qala turǵyny ustaldy, onyń qaıyǵynda 87 keli laqa men balyq aýlaý quraly bolǵan. Materıaldyq shyǵyn 330 myń teńgeni qurady.

Barlyq faktiler boıynsha QR QK 335-babyna saı qylmystyq is qozǵaldy. Tergeý amaldary júrgizilýde.