Qaraǵandy oblysynda beıresmı jumyspen qamtylǵandar medsaqtandyrý qoryna 16 mln teńge aýdardy
QARAǴANDY. QazAqparat – Biryńǵaı jıyntyq tólem engizilgen sátten bastap beıresmı jumyspen qamtylǵan Qaraǵandy oblysynyń turǵyndary medıtsınalyq saqtandyrý qoryna 16 mıllıon teńgeden astam qarjy tóledi, dep habarlaıdy QazAqparat.
Biryńǵaı jıyntyq tólem – beıresmı jumyspen qamtylǵan azamattar úshin birden birneshe júıege qatysýdyń ońaılatylǵan tásili. Ol BJT jalpy tirkelgen somasynan mindetti aýdarymdardyń tórt túrin qamtıdy (qala turǵyndary úshin 1 AEK - 2651 teńge jáne aýyl turǵyndary úshin 0,5 AEK – 1326):
10% -jeke tabys salyǵyna (JTS), 20% - memlekettik áleýmettik saqtandyrý qoryna, 30% - BJZQ-daǵy zeınetaqy tólemderine, 40% - mindetti áleýmettik-medıtsınalyq saqtandyrý qoryna aýdarymdar.
«Óz betinshe jumyspen aınalysýshylar úshin bul yńǵaıly tólem, sebebi zeınetaqy ótili, áleýmettik júıege qatysýy esepke alynady jáne de salyq organdarynda resmı esepte turǵany kórinedi. Sondaı-aq, BJT turaqty tóleý kezinde azamattar «saqtandyrylǵan» mártebesine ıe bolady jáne tegin medıtsınalyq kómektiń kepildendirilgen kólemine ǵana emes, sonymen qatar keńestik-dıagnostıkalyq qyzmetter men joǵary tehnologııalyq operatsııalar kiretin MÁMS paketine de tegin qol jetkizedi», - dep tolyqtyrdy medıtsınalyq saqtandyrý qorynyń Qaraǵandy fılıalynyń bólim basshysy Svetlana Şetkına.
Esterińizge sala keteıik, BJT Qazaqstanda 2019 jyldyń 1 qańtarynan bastap jumys isteıdi. Osy ýaqyttan bastap aımaqtyń 6,5 myńnan astam turǵyny tólem jasaǵan.
