Qaraǵandy oblysynda bes dáriger naýqastyń ólimine kináli dep tanyldy
QARAǴANDY. QazAqparat - Qaraǵandy oblysy Shahtınsk qalasynyń soty áıelge tıisti em-dom júrgizbeı, ony aýrýhanaǵa jatqyzýdan birneshe ret bas tartyp, ólimine sebep bolǵan bes dárigerge aıyptaý úkimin shyǵardy, dep habarlady «QazAqparat» HAA tilshisi.
Sot olardy naýqastyń ólimine kináli dep tanydy. Alaıda qylmys merziminiń ótip ketýine baılanysty jazadan bosatty, ıaǵnı áıel qaza bolǵan ýaqyttan úkim shyqqanǵa deıin eki jyl ótken.
Aıyptalýshylar - Shahtınsk ortalyq aýrýhanasy qabyldaý bóliminiń dáriger-terapevti, emhana kardıology, ortalyq aýrýhananyń kardıologııalyq bólimshesiniń meńgerýshisi, kezekshi feldsher, «Jedel járdem» bóliminiń jelilik feldsheri.
Oblystyq ІІD tergeý basqarmasynyń tergeýshisi anyqtaǵandaı, Shahtınsk turǵyny 1-10 jeltoqsan aralyǵynda birneshe ret jedel járdem shaqyrtqan. Ózi de emhanaǵa jáne ortalyq aýrýhanaǵa birneshe ret kelip, statsıonarǵa jatqyzýyn, júrek syrqatynan emdeýlerin suraǵan. Alaıda, emhana, ortalyq aýrýhana, jedel járdem dárigerleri onyń shaǵymyna jaýapkershilikpen qaramaǵan.
«Naýqasty emdeýge bolatyn ýaqyt ótkizip alynǵan. Bes sottalýshynyń jaýapsyz áreketi qaıǵyly jaǵdaıdyń oryn alýyna alyp keldi», - dedi sotta sýdıa Álııa Sadyqova.
Sottalýshylardyń beseýi de aıyptaryn moıyndamady. Olar naýqasty aýrýhanaǵa shuǵyl jatqyzý belgilerin baıqamaǵanyn aıtyp, ózderin aqtap shyǵýdy surady.
«QK-niń 114-baby 4-bóligi boıynsha sottalýshylardyń kinási is boıynsha jınalǵan dáleldermen rastaldy. Sot aıyptaý úkimin shyǵarady, biraq olardy qylmystyq jaýapkershilikten bosatady, sebebi jaýapqa tartý merzimi ótip ketti. QK-niń 71-baby 1-bóligi 2-tarmaǵyna sáıkes asa aýyr emes qylmys jasaǵan kúnnen bastap eki jyl ýaqyt ótip ketse, tulǵa qylmystyq jaýapkershilikten bosatylady», - dep jarııa etti úkimdi sýdıa Álııa Sadyqova.
