Qaraǵandy oblysynda bes aıda 200-den astam esirtki qylmysy anyqtaldy

QARAǴANDY. QazAqparat – Qaraǵandylyq polıtseıler oblys aýmaǵynda ótken «Qarasora-2020» respýblıkalyq jedel aldyn alý is-sharasynyń qorytyndysyn shyǵardy, dep habarlaıdy QazAqparat tilshisi.

Esirtki qylmysyna qarsy kúres - polıtsııa bólimsheleriniń kúndelikti jumysynyń ajyramas bóligi. Esirtki daıyndaýmen, tasymaldaýmen, ótkizýmen aınalysatyn adamdardyń qylmystyq áreketin áshkereleý jáne jolyn kesý boıynsha ártúrli is-sharalar turaqty negizde júrgiziledi.

Búgingi tańda qyzmettik jumystyń ózekti baǵyttarynyń biri - sıntetıkalyq esirtkiniń jańa túrleriniń taralýyna qarsy kúres. Osyǵan baılanysty 1 maýsym men 30 qazan aralyǵynda kezeńde respýblıka aýmaǵynda keń aýqymdy «Qarasora-2020» keshendi jedel aldyn alý is-sharasy ótkizildi.

Jedel aldyn alý is-sharalarynyń negizgi maqsattary men mindetteri esirtkige baılanysty quqyq buzýshylyqtar men qylmystardyń jolyn kesýde barlyq múddeli quqyq qorǵaý organdary men memlekettik vedomstvolar arasyndaǵy tıimdi ózara is-qımyl bolyp tabylady.

«Qaraǵandy oblysynyń aýmaǵynda polıtsııa qyzmetkerleri «Qarasora-2020» jedel aldyn alý is-sharasyn júrgizý kezinde 219 esirtki qylmysyn anyqtady. Mysaly, tamyz aıynda Qaraǵandy qalasynda elimizdiń ońtústik óńirleriniń biriniń turǵyny ustaldy, onyń avtokóliginiń salonynan 23 kg «gashısh» tabyldy», - dep habarlady Qaraǵandy oblysy PD bastyǵynyń orynbasary, polıtsııa polkovnıgi Ábil Ábildın.

Oqýshy jastarmen profılaktıkalyq jumys nazardan tys qalmaıdy. Jańa oqý jyly qarsańynda «Deni saý urpaq – deni saý ult!» , «Sıntetıkalyq esirtki – jas urpaqqa jańa qaýip» taqyrybynda oqýshylarynyń ata-analarymen onlaın kezdesý ótti.

Oǵan Qaraǵandy oblysynyń polıtsııa departamenti esirtki qylmysyna qarsy is-qımyl basqarmasynyń qyzmetkeri, «Úmit» QB, Qaraǵandy oblystyq JITS ortalyǵynyń, Qoǵamdyq psıhıkalyq densaýlyq ortalyǵynyń jáne Qaraǵandy qalasynyń bilim bóliminiń mamandary qatysty.

«Esirtkiniń taralýyna qarsy is-qımyl boıynsha ınternette aldyn alý jumystaryn jandandyrý úshin Instagram jelisinde «ANTIDRUGKRG» arnaıy esirtkige qarsy paraqsha ashyldy. Onda barlyq nıet bildirýshiler jobanyń qyzmetimen tanysa alady, qajetti keńes alyp, esirtki quraldaryn ótkizetinder týraly habarlaıdy» dep túıindedi polıtsııa polkovnıgi Ábil Ábildın.

Bul jumys turaqty negizde júrgiziledi jáne esirtki bıznesi salasyndaǵy zańsyz is-áreketimen elge zııan keltirýge tyrysatyn adamdardyń jolynda tosqaýyl bolady.