Qaraǵandy oblysynda bes adam gazǵa ýlanyp qaza tapty
QARAǴANDY. QazAqparat - Qaraǵandy oblysynda jekemenshik úıden bes adamnyń máıiti tabyldy, esinen tanǵan taǵy bir adam aýrýhanaǵa jetkizildi.
Aldyn ala málimetterge qaraǵanda olar ıis tıip ýlanǵan, dep habarlaıdy «QazAqparat» HAA tilshisi.
Qaıǵyly oqıǵa Qaraǵandy oblysy Abaı aýdanynyń Dýbovka aýylynda 21 qańtar kúni 20:30-de bir bólmeli jekemenshik úıde bolǵan.
«5 adamnyń denesi tabylyp, 1 adam Qaraǵandydaǵy oblystyq medıtsına ortalyǵyna jetkizildi. Olardyń ólimine gazdan ýlaný sebep bolýy múmkin. Órt synaq zerthanasy mamandarynyń nusqasy boıynsha, olar peshtegi aqaýdyń saldarynan ýlanǵan. 1961, 1981, 1984 jyldary týǵan úsh áıeldiń tulǵasy anyqtaldy», - deıdi Qaraǵandy oblystyq TJD resmı ókili Janna Dáýrenbekova.
Abaı aýdandyq ІІB jedel tergeý toby basqa qaza tapqandardyń tulǵasyn anyqtaý jáne oqıǵa sebepterin tekserý boıynsha jumys júrgizip jatyr.
«Aldyn ala málimetterge súıensek, olar qoǵamnan oqshaý ómir súrgen ári spırtti ishimdikterdiń áserinde bolǵan», - deıdi J. Dáýrenbekova.
