Qaraǵandy oblysynda baspana máselesi qalaı sheshilip jatyr

QARAǴANDY. QazAqparat – Qaraǵandy oblysy Qurylys, sáýlet jáne qala qurylysy basqarmasynyń basshysy Murat Maǵzın Óńirlik kommýnıkatsııalar qyzmeti alańynda ótken brıfıngide halyqty baspanamen qamtamasyz etý jumystary jaıly aıtyp berdi, dep habarlaıdy QazAqparat.

Málim etilgendeı, bıyl óńirde úı kezeginde turǵan 900-den astam adam, onyń ishinde 199 kópbalaly otbasy baspanamen qamtamasyz etiledi. Barlyǵy 400 myń sharshy metr turǵyn úı paıdalanýǵa beriledi.

Jaldamaly úılerge kelsek, osy jyly tórt baspana salynyp, paıdalanýǵa berilgen: Shahtınsk qalasynda 60 páter, Abaıda 80 páter, Shet aýdany Aǵadyr kentinde eki 12 páter.

Kezekte turǵan 346 adam úshin respýblıkalyq bıýdjetten daıyn jalǵa beriletin turǵyn úıdi satyp alýǵa qarajat bólindi.

«Otbasy banki» salymshylary úshin kredıttik turǵyn úı qurylysy boıynsha 8 joba iske asyrylýda.

Salynyp jatqan kópqabatty jáne jeke turǵyn úılerge ınjenerlik-kommýnıkatsııalar tartylyp jatyr. Nátıjesinde jeliler 805 jer ýchaskesine jetkiziledi.

«2023 jyldyń 8 aıynyń qorytyndysy boıynsha Qaraǵandy oblysy boıynsha «Qýatty óńirler – el damýynyń draıveri» ulttyq jobasy aıasynda barlyq qarjylandyrý kózderi esebinen 282,712 myń sharshy metr nemese ótken jyldyń deńgeıine 100,4% paıdalanýǵa berildi», – dep atap ótti spıker.