Qaraǵandy oblysynda barymtashylar úı malyn atyp, urlap otyrǵan
Polisia.kz-tiń jazýynsha, 1 naýryzdan beri Qaraǵandy oblysynda «Skotokrad» respýblıkalyq jedel-aldyn alý sharasy ótip jatyr.
«Alǵashqy úsh kúnniń ózinde ǵana polıtsııa qyzmetkerleri toǵyz ret mal urlaǵan segiz uryny ustady. Buryn jasalǵan 14 qylmystyń beti ashyldy. 11 ret mal urlaǵan eki qylmystyq top áshkere bolyp, ustaldy. Shet aýdanynda 2020 jyly maldy atyp, áketip otyrǵan top ustaldy. Olardyń bul áreketinen 2, 4 mln teńge shyǵyn kelgen. Tintiý kezinde olardan tirkelmegen atys qarýy men zattaı aıǵaqtar tárkilendi», – deıdi Qaraǵandy polıtsııa departamentiniń bastyǵy Ábil Ábildın.
Al Ulytaý aýdanynda 2021 jyly 3 mln teńgeniń iri qarasyn urlady degen kúdikpen eki adam ustaldy. Atalǵan faktiler boıynsha QR Qylmystyq kodeksiniń 188-1 baby boıynsha (Mal urlyǵy) qylmystyq is qozǵalǵan.
Kúdiktilerdiń qylmysy dáleldense, 3 jyldan 12 jylǵa deıin bas bostandyqtarynan aıyrylyp, múlikteri tárkilenýi múmkin.
«Mal urlyǵyna tosqaýyl qoıý úshin respýblıkalyq jáne oblystyq mańyzdaǵy tasjoldarda blokbeket ornatylǵanyn aıtý kerek. Búginge deıin 90 bas mal tabylyp, ıelerine qaıtaryldy», - deıdi polıtseıler.