Qaraǵandy oblysynda barymtashylar bir aýyldyń malyn túgel aıdap áketken
QARAǴANDY. QazAqparat - Barymtashylardyń kesirinen Nura aýdanynyń Ahmetaýyl aýyly malsyz qaldy, dep habarlaıdy «QazAqparat» HAA tilshisi.
«Nura aýdandyq ishki ister organdaryna habarlasqan jylqyshy aýyldan 8 shaqyrym jerdegi jaılaýda jaıylyp júrgen 93 jylqyny barymtashylar aıdap ketkenin aıtty», - dep málimdedi oblys ishki ister departamenti baspasóz qyzmetiniń basshysy Baqytjan Qudııarov.
Jedel iszdestirý sharalarynyń nátıjesinde barymtashylar Aqmola oblysynyń Arshaly aýdanynda ustalǵan.
«35 pen 49 jas aralyǵyndaǵy bes kúdikti ustaldy. Olar jasyrýǵa qolaıly bolýy úshin úlken úıirdi birneshe bólikke bólgenin moıyndady. Qaraǵandylyq polıtseıler Aqmola oblysyndaǵy áriptesterimen yntymaqtastyqta Arshaly aýdanynyń Jibek Joly, Bulaqsaı, Saryoba, sondaı-aq Shortandy aýdanynyń Shortandy aýylyna jasyrylǵan jylqyny qaıtardy», - dedi Baqytjan Qudııarov. Kúdiktiler Nura aýdandyq ІІB ýaqytsha ustaý oqshaýlaǵyshyna jiberildi. Qylmystyq kodekstiń 188-baby («Urlyq»), 4-bóligi boıynsha sotqa deıingi tergeý amaldary júrip jatyr.
Polıtsııa turǵyndardy malyn tirkeýge alyp, árbirine tańba basýǵa, sondaı-aq jaıylymdaǵy maldy qaraýsyz qaldyrmaýǵa shaqyrady.
