Qaraǵandy oblysynda balyq aýlaýǵa jáne jattyǵýǵa ruqsat etildi
Qalalar arasyndaǵy avtobýs qatynasy jańartylýda. Turǵyndarǵa ań aýlaý jáne balyq aýlaýǵa ruqsat etildi. Sporttyq keshender, monshalar men saýnalar kelýshilerdiń sanyn shekteı otyryp jáne sanıtarlyq-karantındik talaptardy saqtap jumys isteıtin bolady.
Oblys ákiminiń orynbasary Álisher Ábdiqadyrov, Taýarlar men qyzmetterdiń sapasy men qaýipsizdigin baqylaý departamentiniń basshysy Qanat Asqarov Saryarqa telearnasynda tikeleı efırde ótken brıfıngte óńirdegi karantındi jeńildetý týraly áńgimeledi.
«18 mamyrdan bastap Qaraǵandy oblysynda Temirtaý men Botaqara kentinen basqa eldi mekenderde karantın sharalaryn jeńildetýdiń kelesi kezeńi engiziledi. Qaraǵandy - Abaı, Qaraǵandy - Saran, Qaraǵandy - Shahtınsk, Qaraǵandy-Shahan, Qaraǵandy - Topar, Jezqazǵan - Sátbaev baǵyttary boıynsha avtobýs marshrýttary jańartylýda. Múlikti baǵalaý jónindegi kompanııa men aýdıtorlyq keńseler jumysyna kirise alady. Basseınderdi qospaǵanda, sport nysandary ashylady, shuǵyldanýshylar sany 30 adamnan aspaýy tıis. Burynǵysynsha kórermenderdiń qatysýymen jarystar men buqaralyq is-sharalarǵa tyıym salynǵan», - dedi Álisher Ábdiqadyrov.
Kúsheıtilgen karantındegi aýmaqtar - Temirtaý men Botaqara kentinen basqa eldi mekenderde ań aýlaý men balyq aýlaýǵa ruqsat etildi.
Álisher Ábdiqadyrovtyń aıtýynsha, 25 mamyrdan bastap balabaqshalarda 10 adamǵa deıin kezekshi toptar ashý josparlanýda (Temirtaý men Botaqarany qospaǵanda). Qazir qajetti daıyndyq jumystary júrgizilýde.
Jolaýshylarǵa qyzmet kórsetý úshin Qaraǵandy avtovokzaly, Shahtınsk, Abaı, Saran, Jezqazǵan, Sátbaev, Topar jáne Shahan kentteriniń avtostantsııalary ashylady.
Saýda, oıyn-saýyq ortalyqtarynda, saýda úıleri men bıznes-ortalyqtarda (Temirtaý men Botaqarany qospaǵanda) birinshi qabatta ornalasqan dúkender jumys isteı alady.
Qanat Asqarovtyń aıtýynsha, bul ruqsat tek kósheden bólek kire alatyn jáne basqa bólimderden oqshaýlanǵan nysandarǵa ǵana qatysty.
Monshalar men saýnalarǵa jalpy syıymdylyǵynan 50% ǵana kelýshilerdi qabyldaý jáne sanıtarlyq-epıdemıologııalyq talaptardy oryndaı otyryp (Temirtaý men Botaqaradan basqa) jumys isteýge ruqsat etiledi. Kelýshiler keminde eki metr qashyqtyqty saqtaýy tıis.
Vahtany ótkizý kezinde Qaraǵandy oblysyna basqa óńirlerden vahtaǵa nemese vahtadan keletin jumyskerlerdiń qyzmeti bastalǵanǵa nemese aıaqtalǵanǵa deıin keminde 3 kún buryn jasalǵan koronavırýstyq ınfektsııaǵa PTR-dıagnostıka nátıjesi bolýy tıis.
«Barlyq ashylatyn nysandarda kúsheıtilgen sanıtarlyq-dezınfektsııalyq rejımdi saqtaý mindetin eske salǵym keledi. Kásiporyn ıeleri, basshylary qyzmetkerlerdiń densaýlyǵyna jaýapty. Juqtyrý qaýpi áli de joǵary. Koronavırýstyq ınfektsııany biz áli jeńgen joqpyz. Ózińizderińizdi jáne jaqyndaryńyzdy qorǵańyzdar. Jeke gıgıena erejelerin, áleýmettik qashyqtyqty saqtańyzdar. Múmkindiginshe úılerińizde qalyńyzdar», - dedi oblystyń bas memlekettik sanıtarlyq dárigeri.
