Qaraǵandy oblysynda balasyn ertken júkti áıel qar qursaýynan qutqaryldy
QARAǴANDY. QazAqparat - Qaraǵandy oblysy TJD qyzmetkerleri túni boıy jolda qalyp qoıǵan júrgizýshiler men jolaýshylardy qutqardy, onyń ishinde balasyn ertken júkti áıel de bar, dep habarlady «QazAqparat» HAA tilshisi.
Táýlik ishinde 48 adam qutqarylyp, evakýatsııalandy. TJD derekterine sáıkes eshkimdi úsik shalǵan joq.
«Qarqaraly aýdany TJB men órt sóndirý jáne avarııalyq-qutqarý jumystary qyzmetiniń qyzmetkerleri Qyrǵyz kenti aýylynyń mańynan janynda balasy bar júkti áıel men 4 adamdy qutqardy. Olar «Nıssan» kóligimen turyp qalǵan», - dep habarlady TJD baspasóz qyzmetinen.
Temirtaý mańynda Almaty-Ekaterınbýrg kúre jolynda jeti adam qutqaryldy. Ýchaskede úsh júk kóligi men bes jeńil kólik soqtyǵysqan apat bolǵan. Saldarynan 50 shaqty tehnıka kepteliste turyp qaldy. Oktıabr aýdanynda qarda qalyp qoıǵan alty mashınadan 10 adam evakýatsııalandy. Zardap shekkender joq.
