Qaraǵandy oblysynda balalarǵa júzýden sabaqtar tegin ótkiziledi

QARAǴANDY. QazAqparat – Qaraǵandy oblysy ákiminiń bastamasymen Dene shynyqtyrý jáne sport basqarmasy Qaraǵandy jáne Temirtaý bilim bólimderimen birlesip, balalarǵa sýda júzý mashyqtaryn úıretýdi uıymdastyrdy, dep habarlaıdy QazAqparat.

Halyqtyń áleýmettik osal toptarynan shyqqan balalar sýda júzý negizderin tegin úırenedi. Qalǵan bastaýysh jáne orta synyp oqýshylary úshin bir sabaqtyń quny 250 teńgeni quraıdy.

Balalar men jasóspirimder saraıynyń janyndaǵy basseınde jalpy bilim beretin 6 mekteptiń balalary jattyǵady. Oqytý senbi jáne jeksenbiden basqa kúnderi 10.00-den 12.00-ge deıin júrgiziledi. Sabaq 45 mınýtqa sozylady.

«Karantındik shekteýlerge baılanysty topta 15 baladan artyq bolmaıdy. Oqý jyly bastalǵanǵa deıin 1,5 myń balany qamtýdy josparlap otyrmyz. Bizdiń basseın 1 tamyzǵa deıin jumys isteıdi, sodan keıin kosmetıkalyq jóndeýge jabylady. Ázirshe ýaqyt bar, Qaraǵandynyń barlyq mektepterin «Qaýipsiz sý» aktsııasyna qatysýǵa shaqyrǵym keledi», – dep túsindirdi olımpıadalyq rezervtegi júzý sporty mektebiniń dırektory Moldabek Sherimov.

Júzý boıynsha jattyqtyrýshy Irına Nazarovanyń aıtýynsha, atalmysh aktsııa balalaryn ómirin qutqaryp qalýǵa kómektesedi.

«Jalpy, biz jyl saıyn jazda mektep lagerleriniń balalary úshin sabaqtar ótkizemiz. Júzý boıynsha bastapqy bilimdi úıretemiz. Birinshi daǵdy – sýdan qoryqpaýdy jáne durys dem alýdy úırený. Bizge sýda ózin qalaı ustaý kerektigin bilmeıtin balalar keledi. Bireýi tez úırenedi, bireýine uzaq ýaqyt qajet. Al, kózge túsken balalalrdy júzý mektebimizge jazamyz», – deıdi jattyqtyrýshy.

Balalar júzý sabaqtaryna qýana qatysady. Nusqaýshylardy muqııat tyńdap, olar sýdan qorqý sezimin jeńip, ómirlik daǵdylardy ıgere otyryp úırenedi.

23 maýsymnan bastap mundaı sabaqtar Temirtaý «Jastar» basseıninde de ótip jatyr. Búgingi tańda júzý boıynsha sabaqtardy qalanyń 25 mektebinen 396 oqýshy alýda. Jattyǵýlar demalys kúnderin qosa alǵanda, kún saıyn 09:00-den 10:00-ge deıin jáne 10:00-den 11:00-ge deıin ótkiziledi. Mamandar atap ótkendeı, basseınge kúnine 80 oqýshy barady.

«Bul is-sharanyń maqsaty – jazǵy ýaqytta tótenshe jaǵdaılardyń aldyn alý. Sý aıdyndarynda balalar sýǵa batyp ketken jaǵdaılar óte kóp. Men barlyq balanyń júze bilgenin qalaımyn. 1 shildeden bastap «Jastar» basseıni jóndeýge jabylady. Biraq 1 tamyzdan bastap sabaqtar qaıta jalǵasyp, oqý jyly bastalǵanǵa deıin jalǵasady», – dedi Temirtaý qalasy bilim berý bóliminiń bas mamany Aıman Áshkeeva.