Qaraǵandy oblysynda balalarǵa arnalǵan tegin sektsııa men úıirme máselesi sheshildi

QARAǴANDY. QazAqparat – Qaraǵandy oblysynda 2021 jylǵa arnalǵan aımaq bıýdjetin naqtylaý kezinde memlekettik sport jáne shyǵarmashylyq tapsyrystarǵa qarajat bólindi. Oblystyq máslıhat depýtattary onlaın rejıminde ótken kezekten tys V sessııasynda shyǵystardaǵy ózgeristerdi bekitti, dep habarlaıdy QazAqparat tilshisi.

«Bólýge usynylatyn qosymsha qarajat kózderi aýdandar men qalalar bıýdjetiniń kiris bóligin, jergilikti atqarýshy organdardyń rezervin kútiletin asyra oryndaý, memlekettik satyp alý qorytyndylary boıynsha únemdeý, transfertterdi qaıtarý esebinen qalyptasty. Qarajat áleýmettik salaǵa, bıýdjettik ınvestıtsııalyq jobalardy iske asyrýǵa, damý bıýdjetine baǵyttaldy», – dep baıandady qarjy basqarmasynyń basshysy Lıýdmıla Basharına.

Ol memlekettik sport jáne shyǵarmashylyq tapsyrystardy qarjylandyrý qarastyrylǵanyn habarlady. Balalar qyzyǵýshylyǵy bar sektsııalar men úıirmelerge tegin qatysady.

Taǵy bir mańyzdy másele – balalar qaýipsizdigin qamtamasyz etý: mektepterde týrnıketter, beınebaqylaý júıeleri men dabyl túımeleri ornatylady.

Bilim berý, densaýlyq saqtaý, áleýmettik qorǵaý, sport jáne mádenıet nysandarynyń materıaldyq-tehnıkalyq bazasyn nyǵaıtý jáne jóndeý jumystaryn qosymsha qarjylandyrady. Múgedek adamdarǵa áleýmettik qyzmetter portaly arqyly satyp alynatyn ońaltý quraldary, shıpajaı-kýrorttyq joldamalardyń quny bıýdjetten óteledi.

Somanyń bir bóligi ınfraqurylymdy damytýǵa jumsalady. Bul sý qubyry jelisin qaıta jańartý, avtojol men kópirlerdi jóndeý, jylýmen jabdyqtaý jelileri men áleýmettik nysandardy salý. Saran qalasyn damytý boıynsha jobalar qarjylandyryldy.

Sondaı-aq, aýyl ákimderin saılaýdy uıymdastyrýǵa qarajat qarastyrylǵan.

«Biz óńirdiń damýy úshin mańyzdy bastamalar men memlekettik baǵdarlamalardy iske asyrýdy jalǵastyramyz. Mańyzdy blok – bul ınjenerlik-kommýnıkatsııalyq jáne kólik ınfraqurylymyn damytý. Ózderińiz biletindeı, bıyl eń az degende 660 myń sharshy metr turǵyn úı paıdalanýǵa beriledi, bul 2020 jylǵa qaraǵanda shırek ese kóp, turǵyn úı qory 7 000 páterge ulǵaıtylady. Tıisinshe, ınjenerlik kommýnıkatsııalardy júrgizý qajet. Bul másele sheshiletin bolady. Qaraǵandyda jylýmen jabdyqtaýdyń magıstraldyq jelileriniń, Shahtınsk qalasynda qazandyqtyń qurylysyn jalǵastyramyz. Balqashta jylý jelilerin qaıta qurýdy bastaımyz», – dep atap ótti oblys ákimi Jeńis Qasymbek.

Oblysta «Bıznestiń jol kartasy – 2025», «Jumyspen qamtýdyń jol kartasy», «Eńbek» baǵdarlamalary boıynsha kásipkerlik bastamalardy qoldaý jalǵastyrylady. Bul jańa jumys oryndaryn qurýǵa múmkindik beredi.