Qaraǵandy oblysynda balalar baqshasynda kezekshi toptar qyzmetin jandandyrdy
NUR-SULTAN. QazAqparat - Qaraǵandy oblysynda karantındi kezeń-kezeńmen jeńildetý jalǵasýda. Shekteý sharalaryn odan ári jeńildetý týraly sheshim epıdemıologııalyq jaǵdaılardy eskere otyryp qabyldanady, dep habarlaıdy oblystyq ákimdiktiń baspasóz qyzmeti.
Óńirde balalar baqshasynda kezekshi toptar – bir ýaqytta onda 15 bala tabylýy tıis, fıtnes-ortalyqtar men sport-saýyqtyrý klýbtary qyzmeti jandandyryldy.
Bul týraly Taýarlar men kórsetiletin qyzmetterdiń sapa, qaýipsizdigin baqylaý departamentiniń basshysy Qanat Asqarov brıfıngte málimdedi.
Ol Qaraǵandy oblyssynyń bas memlekettik sanıtarlyq dárigeriniń m.a.-nyń 2020 jylǵy 15 tamyzdaǵy №35 qoldanystaǵy qaýlysyna engizilgen ózgertýler týraly baıandady.
Balalar baqshasynda mektepke deıingi mekeme qýatyna sáıkes balalar sany 15 adamnan aspaıtyn toptardy ashýǵa ruqsat beriledi.
Fıtnes-ortalyqtary men sport-saýyqtyrý ortalyqtarynyń (basseınsiz) qyzmetine aldyn ala jazylýmen qatań – bir kelýshige keminde 5 sh.metr jáne nysan tolymdylyǵy 50%-dan aspaıtyn eseppen ruqsat beriledi.
Ulttyq qurama, klýb komandalaryna 30 adamnyń qatysýymen kontaktisiz termometrııamen qamtamasyz etýmen, sport bazasynda turý arqyly sport jattyǵýlaryn ótkizýge ruqsat beriledi.
TÓKS, avtojýý, shınomontaj sheberhanalarynyń jumys kestesi sanıtarııalyq sharalardy kúsheıtýmen saǵat 09:00-18:00-ge deıin belgilendi.
Qanat Asqarov qaıtadan ashylǵan nysandar úshin talaptardy saqtaý qajetiligi týraly eske saldy.
Qoǵamdyq oryndarda – ǵımaratta jáne kóshede, qoǵamdyq kólikterde 5 jasqa deıin balalardy qospaǵanda, betperde taǵý mindetti bolyp tabylady.
Oıyn-saýyq, qoǵamdyq jáne eske alý sharalaryn, onyń ishinde úıde ótkizýge tyıym salý jalǵasady. 65 jastan asqan adamdarǵa demalys kúnderi jáne qarbalas saǵattary kóshege shyǵýdy shekteý usynylady.
- Shekteýler men ózin-ózi oqshaýlaý rejımi – juqpaly aýrýdyń taralý tizbegin úzýge múmkindik beretin asa tıimdi shara. Sizderden jeke gıgıena, áleýmettik qashyqtandyrý sharalaryn buljytpaı saqtaýdy suraımyn. Esińizde bolsyn: karantın sharalaryn odan ári jeńildetý týraly máseleni qaraý tek aýrý sany azaıǵanda ǵana yqtımal, - dep atap ótti Qanat Asqarov.
