Qaraǵandy oblysynda balaǵat sóz aıtqan ákim jaýapqa taryldy
QARAǴANDY. QazAqparat - Memlekettik qyzmet jáne sybaılas jemqorlyqqa qarsy is-qımyl departamentiniń qyzmetkerleri Qaraǵandy oblysynda jospardan tys tekserý júrgizip, aýyldyq okrýg ákiminiń qyzmettik ádep erejesin buzǵanyn anyqtady, dep habarlaıdy QazAqparat tilshisi.
«Budan buryn Qaınarbulaq aýyldyq okrýgi ákiminiń apparatynda jumys isteıtin bas mamannyń shaǵym túsirýine baılanysty jospardan tys tekserý júrgizilip, Qızat Saǵatbekovtiń qyzmettik ádep erejesin buzǵany anyqtaldy», - dep málimdedi memlekettik qyzmet salasyndaǵy baqylaý basqarmasynyń bas mamany Dáýren Orazbaev.
2018 jyldyń 16 sáýirinde Qızat Saǵatbekov jumys ýaqytynda bas mamanmen áńgimelesý kezinde daýys kóterip, beıádep sózder aıtqan.
Qyzmettiń tekserý barysynda aýyldyq okrýgtiń ákimi qyzmettik ádep erejesin buzǵanyn moıyndady.
Osylaısha, Qarqaraly aýdany Qaınarbulaq aýyldyq okrýgi ákiminiń áreketinen QR Ádep kodeksiniń 9-tarmaǵy 7-taraqshasy jáne 5-tarmaǵy 2-tarmaqshasyn buzý belgileri baıqaldy.
