Qaraǵandy oblysynda balabaqshalar, meıramhanalar men dámhanalar qashan ashylady
QARAǴANDY. QazAqparat - Eldegi tótenshe jaǵdaı rejımi alynyp tastaldy, biraq karantın áli de qalady. Qaraǵandy oblysy ómirdiń qalypty yrǵaǵyna qashan orala alady? Balabaqshalar men ortalyqtar jumysyn qashan jańartyp, iri saýda ortalyqtarynda býtıkter ashylady? Osy jáne basqa da suraqtarǵa Qaraǵandy oblysynyń Taýarlar men qyzmetterdiń sapasy men qaýipsizdigin baqylaý departamentiniń basshysy Qanat Asqarov jaýap berdi, dep habarlaıdy QazAqparat tilshisi.
- Karantın qashan alynady?
- Oblys boıynsha karantındik sharalardy kezeń-kezeńmen jeńildetý júrip jatyr. Ózderińiz biletindeı, mamyr aıynyń basynan bastap Temirtaý qalasynan basqa barlyq qalalar men aýdandar boıynsha jeńildikter bastaldy. Bul qalada da 12 mamyrdan bastap rejım álsiredi.
Biraq koronavırýstyq ınfektsııanyń taralý qaýpi áli de bar. Odan ári sheshimder epıdemıologııalyq jaǵdaıdy eskere otyryp qabyldanatyn bolady.
- Balabaqshalar men ortalyqtar qashan ashylady?
- Balabaqshalar men mektepke deıingi mekemeler bizde tórtinshi sanattaǵy jeńildetý deńgeıinde. Olardy ashqanǵa deıin kezekshi toptar da bolmaıdy. Biz balalardyń densaýlyǵyna qaýip tóndire almaımyz.
- Qoǵamdyq tamaqtaný oryndary men iri saýda úıleri qashan ashylady dep josparlanýda?
- Bul másele keıinirek qaralady. Biz keıbir elderde karantın bosaǵannan keıin taǵy da órshý bolǵanyn bilemiz. Sondyqtan bul bıznes-nysandar áli de tyıym salý aýmaǵynda qalyp otyr.
- Balyq aýlaýǵa shyǵýǵa bola ma?
- Bul qyzmet túri ázirge ruqsat etilmegen. Jaqyn arada bul máseleni qarastyramyz.
- Klınıkalar josparly operatsııalar jasala bastaıdy ma?
- Emhanalar ýaqyt boıynsha shekteýmen jumys isteıdi: 9.00-den 16.00-ge deıin. Densaýlyq saqtaý basqarmasy basshysynyń buıryǵyna sáıkes, 4 mamyrdan bastap josparly emdeýge jatqyzý jáne josparly tekserýler qaıta bastaldy.
- Josparly emdeýge jatqyzý kezinde koronavırýsqa taldaý jasaý mindetti me? Eger mindetti bolsa, onda kimniń esebinen?
- Ýchaskelik dárigerge barý kerek jáne ol zertteýge joldama beredi. Emhanalarda materıaldar jınaýǵa arnalǵan kabınetter ashyldy. Taldaýdy josparly emdeýge jatqyzýdan jeti kún buryn jasaý kerek. Protsedýra tegin, medıtsınalyq saqtandyrý qory esebinen júrgiziledi.
- COVID-19-ǵa qansha taldaý jasaldy?
- Búgingi tańda 50 myńǵa jýyq zertteý júrgizildi. Bul der kezinde syrqattanǵandardy anyqtaýǵa jáne olarǵa qajetti medıtsınalyq kómek kórsetýge múmkindik beredi. Zertteýler jalǵasady. Bul máselege qatysty problemalar joq.
- Koronavırýstan emdelip jatqan adamdar qaıta aýyryp qalýy múmkin be?
- Biz emdelýshilerdi shyǵarǵannan keıin baqylaımyz. Jáne derttiń qaıtalanýynyń birde-bir oqıǵasy bolǵan joq.
-Bizde SOVID-19 emdeý úshin ımmýndyq plazmany qoldaný tájirıbesi bar ma?
- Bul jaqsy ádis. Ol Qytaıda, Reseıde qoldanylady. Qazaqstanda bul ádis koronavırýsty dıagnostıkalaý men emdeýdiń klınıkalyq hattamasyna qosyldy. Bekitilgennen keıin áreket etedi. Jaqyn arada ımmýndyq plazmany qoldanýǵa ruqsat etiledi dep kútilýde. Árıne, donorlardy baqylaý óte mańyzdy bolady.
