Qaraǵandy oblysynda balabaqshaǵa tegin oryndar satylyp kelgen
QARAǴANDY. QazAqparat – Qaraǵandy oblysynda balabaqshalarǵa tegin oryndy satatyn deldaldardy anyqtaý bastaldy. Jaýapkershilikke tek kómekshiler ǵana emes, klıentter de tartylýy múmkin, dep habarlaıdy QazAqparat tilshisi.
Zańsyz shemalarǵa qarsy is-qımyl sharalary týraly Óńirlik kommýnıkatsııalar qyzmeti alańynda ótken onlaın brıfıngide Bilim basqarmasynyń basshysy Gúlsim Qojahmetova aıtyp berdi.
«Mektepke deıingi bilim berý salasyndaǵy memlekettik qyzmetter tolyǵymen avtomattandyrylǵan. Sybaılas jemqorlyq táýekelderiniń aldyn alýdy kúsheıtý úshin barlyq mektepke deıingi uıymdar biryńǵaı platformaǵa aýystyryldy. Bul jan basyna qarjylandyrýdy bólý men kelýdi baqylaýǵa múmkindik beredi», - dep atap ótti spıker.
Ata-analar balabaqshalardyń jumysyn baǵalaı alady. Platformada tamaqtaný sapasy, balanyń qaýipsizdigi, tárbıeshilerdiń kásibıligi úshin ball qoıý usynylady. Tamaqtanýdy baqylaý úshin «Vırtýaldy qoıma + elektrondyq shot-faktýralarmen ıntegratsııa» modýli engizildi.
Balabaqshaǵa kezekke turyp, ótinishti «Indıgo 24 KZ» avtomattandyrylǵan servısi arqyly berýge bolady. Kezekte turǵandardyń tizimi, bos oryndardyń bolýy sekildi barlyq aqparat ashyq jáne qoljetimdi.
«Bul sharalar «kómekshiler« qyzmetin boldyrmaý úshin qoldanylady. Deldaldar áldebir tanystary baryn aıtyp jáne olar erekshe resýrstarǵa qol jetkize alatynyn aıtyp qyzyqtyrady. Al shyn máninde tegin qyzmetterdi satýmen aınalysady. Biz osyndaı adamdardy anyqtaı bastadyq. Ýákiletti organdarǵa keıbir adamdarǵa qatysty turǵylyqty jerin anyqtaý úshin suraý joldandy, jaýapkershilikke uıymdastyrýshylar ǵana emes, tapsyrys berýshiler de tartylatyn bolady», - dep málim etti Gúlsim Qojahmetova.
Qaraǵandy oblysynda 533 mektepke deıingi uıym jumys isteıdi, onyń 83-i jekemenshik nysan.
