Qaraǵandy oblysynda «Baqytty otbasy» baǵdarlamasy boıynsha alǵashqy nesıe berildi
NUR-SULTAN. QazAqparat - Qaraǵandyda «Baqytty otbasy» baǵdarlamasy bastalǵannan beri 500-ge jýyq ótinish qabyldandy. Bul týraly qala ákimi Nurlan Áýbákirov Turǵyn úı qurylys jınaq bankiniń oblystyq fılıalynyń jańa ofısi ashylý barysynda habarlady.
Bankırler qala ortalyǵyna Buqar jyraý dańǵyly, 57/1 meken-jaıy boıynsha keń mekemege kóshti. Endi klıentterge bankke jetý áldaqaıda yńǵaly bolady. Keńseler de zamanaýı talaptarǵa jaýap beredi. Munda tipti balalar oıyn alańy bar.
Banktiń jańa keńsesiniń ashylý saltanatynda qarjy úıiniń qyzmetkerleri ǵımarat aldynda kıiz úı quryp, barlyǵy birigip shańyraq kóterdi. Qaraǵandy oblysynda turǵyn úı qurylys jınaq bankiniń 95 myńnan astam salymshysy bar. Jaqyn arada mereıtoılyq juz myńynshy klıent keledi dep kútilýde.
Turǵyn úı jınaq banki quraldarynyń kómegimen 8000 qaraǵandylyq otbasy qonys toıyn toılady, tek osy jyly – 1500 januıa baspanaly boldy. Bank Basqarmasynyń tóraǵasy Lázzat Ibragımova «Nurly jer» baǵdarlamasyn júzege asyrýǵa belsendi qatysqany jáne barlyq máselelerdi jedel sheshkeni úshin Qaraǵandy qalasynyń basshylyǵyna alǵysyn bildirdi.
Elbasynyń tapsyrmasy boıynsha ázirlengen «Baqytty otbasy» jańa baǵdarlamasy tabysy tómen kóp balaly jáne tolyq emes otbasylarǵa jeke turǵyn úı alý armanyn júzege asyrýǵa múmkindik berdi. Oǵan múmkindigi shekteýli balalardy tárbıelep otyrǵan otbasylar da qatysa alady. Qaryzdar jyldyq 2% mólsherleremesi boıynsha, 19 jylǵa deıingi merzimge beriledi.
- Búgingi kúni qalada turǵyn úı qurylysy belsendi túrde ósýde. Qalada «Baqytty otbasy» baǵdarlamasy bastaldy jáne tórt kún ishinde 486 ótinish qabyldandy. Al bizde osy sanat boıynsha úı ala alatyn 4410 otbasy kezekte tur. Bul baǵytta áli de qarqyn ulǵaıady. Meniń oıymsha, qaraǵandylyqtar osy baǵdarlamanyń barlyq artyqshylyqtaryn kórip, óz baspanasy týraly armanyn júzege asyra alatyn bolady, - dedi Nurlan Áýbákirov.
Oblysta jańa baǵdarlama boıynsha alǵashqy nesıe berildi.
- Biz aýyldan qalaǵa kóshemiz. Biz qarapaıym otbasymyz. Men memlekettik qyzmette jumys isteımin, al jubaıym azamattyq qyzmetshi. Úsh balamyz bar. Múmkindigi shekteýli qyzymyzdy tárbıelep otyrmyz. Tórt jyl buryn oǵan turǵyn úı qurylys jınaq bankinde shot ashtyq. Ol 18 jasqa kelgende úı satyp ala alady dep oılaǵan edim. Biraq armanymyz áldeqaıda erterek oryndaldy. Endi jaldamaly páterdiń ornyna ózimizdiń jeke páterimiz bar, jaqyn kúnderi oblys ortalyǵynda jańa qonys toıyn toılaımyz, - dedi Shet aýdany Aqsý-Aıýly aýylynyń turǵyny Ásel Ábisheva.
Sátpaev qalasynda turǵan kóp balaly ana Samal Janatqyzy Ramazan saltanatty sharaǵa kele almady, alaıda quttyqtaý lebizderin bildirip dybys habarlamasyn jibergen eken.
- Bizdiń ber balamyz bar, ata-anammen birge turamyz. Óz páterimiz týraly kópten beri armandaǵan edik. Aǵymdaǵy jyldyń naýryz aıynan bastap «Baqytty otbasy» baǵdarlamasyna kirý úshin qujattar daıyndap, jaqynda tórt bólmeli páter satyp aldyq. Endi barlyq balalarǵa bolashaqta árqaısysynda óz baspanasy bolýy úshin otbasylyq depozıtter ashamyz, , - dedi baǵdarlama qatysýshysy qýanyshymen bólise otyryp.
Qaraǵandylyq Qýat Qusaıynov pen Dana Vdovına óz jumys berýshileri – «Nátıje Sút» JShS men «Abzal» saýda úıinen árqaısysy bir mıllıon teńgege turǵyn úı sertıfıkattaryn aldy. Al «Evrazııa bıldıng» qurylys salýshy kompanııasy segiz bala tárbıelep otyrǵan kóp balaly Qumkenovtar otbasyna páter syılady.
- Bul bıznestiń áleýmettik jaýapkershiliginiń tamasha úlgileri. Óz qyzmetkerlerine qamqorlyq kórsetetin kompanııalar memleket tarapynan salyqtyq jeńildikter alýy tıis dep sanaımyn, - dep atap ótti TQJB basqarmasynyń tóraǵasy. – «Baqytty otbasy» baǵdarlamasy eń aldymen balalarǵa, olarǵa teń múmkindikterdi qamtamasyz etýge baǵyttalǵan. Qazirgi tańda Qazaqstanda balalar ýaqytsha jer úılerde, kóp balaly otbasylar tar páterlerde turmaýy kerek. Bul bolashaq baǵdarlamasy.
