Qaraǵandy oblysynda áıelder kásipkerligi qalaı damýda
Áıelder kásipkerligin damytý jáne oǵan qoldaý kórsetý máselelerin óńir basshysy Jeńis Qasymbek pen Qazaqstannyń isker áıelder qaýymdastyǵynyń prezıdenti Raýshan Sársembaeva kezdesý barysynda talqylady.
«Búginde áıelder óńirdegi kásipkerlik salasynyń jartysyn basqarady, al bul – 41,5 myń kompanııa. Olar bıznespen aınalysatyndardyń úshten bir bóligin jumyspen qamtamasyz etedi. Bul tek saýda, qyzmet kórsetý, jyljymaıtyn múlik naryǵy, qonaq úı jáne meıramhana bıznesi ǵana emes, sonymen qatar aýyl sharýashylyǵy, ónerkásip. Qyzmet aıasy jyl saıyn keńeıip keledi», – dep atap ótti Jeńis Qasymbek.
«Bıznestiń jol kartasy – 2025» baǵdarlamasy boıynsha memleketten 2,2 mlrd teńgege 340 joba kómek aldy, olardyń bastamashysy – áıelder. Jyl saıyn «Eńbek» baǵdarlamasy boıynsha jeńildetilgen shaǵyn nesıe alýshylardyń úles salmaǵy ósýde. «Bastaý bıznes» kýrstarynda oqıtyndardyń 70% jýyǵy – isin jańa bastaǵan kásipkerler. Áıelder úlesine 500 myńnan 5 mln teńgege deıingi barlyq granttardyń 60% astamy tıesili.
«Búginde óńirde áıelder qaýymy shoǵyrlanýda. Biz kúshterimizdi biriktirýdi aldymyzǵa mindet etip qoıdyq jáne oılaǵanymyz sátti júzege asty. Árbir qala men aýdanda isker áıelder qaýymdastyǵy jáne Áıelder kúshteri alıansy jumys isteıtin bolady. Qyzmet salasy úlken – bıznes júrgizýde kómek kórsetý, saıası kóshbasshylyq, turmystyq zorlyq-zombylyqqa qarsy kúres, áleýmettik máseleler, quqyqtyq oqytý. Biz tálimgerlik, koýchıng uıymdastyrýǵa daıynbyz. Bızneske kelgen qyzdarǵa kómektesý kerek», – dedi Raýshan Sársembaeva.
Kezdesýde Áıelder kúshteri alıansynyń qoldaýymen birneshe áleýmettik joba usynyldy. Oblysta kolledjder men ýnıversıtetterdiń stýdentteri úshin kóshbasshylyq klýbtary paıda bolýy múmkin. Basqa bastamalar densaýlyq, áleýmettik kásipkerlikti damytý, quqyqtyq oqytý máselelerine qatysty boldy.
