Qaraǵandy oblysynda «Aıbyn» áskerı-patrıottyq jastar jıyny ótip jatyr
Іs-sharaǵa Qazaqstan Respýblıkasynyń Prezıdenti - Qarýly Kúshterdiń Joǵarǵy Bas qolbasshysy Qasym-Jomart Toqaev qatysty. Sondaı-aq áskerı polıgonǵa Qorǵanys mınıstri, general-maıor Nurlan Ermekbaev, Parlament depýtattary, Qaraǵandy oblysy ákimdiginiń basshylyǵy, Qarýly Kúshter ardagerleri men shaqyrylǵan qonaqtar jınaldy.
Shara bastalar aldynda el Prezıdenti - Joǵarǵy Bas Qolbasshy dala lagerine, «Aıbyn» dostyq mekeni alleıasyna, Jastar alańyna, oqý oryndaryna, atys qarýynyń, áskerı tehnıka úlgileri men basqa da tehnıkalyq quraldardyń kórmesine bardy.
Jıynǵa qatysýshylar aldynda sóılegen sózinde Qazaqstan Respýblıkasynyń Prezıdenti ashylatyn is-sharanyń mańyzyn atap ótti. Sonymen qatar, ol besinshi respýblıkalyq «Aıbyn» áskerı-patrıottyq jastar jıyny Qazaqstan Respýblıkasynyń Tuńǵysh Prezıdenti - Elbasy Nursultan Nazarbaev jarııalaǵan Jastar jyly aıasynda ótkiziletinin atap ótti.
«Otanymyzǵa adal, jaýapkershiligi joǵary, qaıratty jáne qaısar jastarymyzdyń basyn qosqan bul jıynnyń mán-mańyzy aıryqsha. Biz Táýelsiz elimizdiń búgingi jastaryna árqashan zor úmit artamyz, senemiz. Qazaqstannyń árbir jetistigi ózderińiz sııaqty jas órenderdiń alańsyz, jarqyn keleshegi úshin jasalǵan qadam. Búginde elimizge barsha álem qaýymdastyǵy qurmetpen qaraıdy. Memleketimiz qarqyndy damýda. Munyń barlyǵy tarıhı turǵydan alǵanda qysqa merzimde atqarylǵan tabandy eńbektiń nátıjesi. Elimizdiń abyraoıyn arttyrý sizderdiń Otan aldyndaǵy qasterli boryshtaryńyz. Jaqsy dástúrge aınalǵan «Aıbyn» áskerı-patrıottyq jastar jıyny - otanshyl jastardy adal qyzmet etýge, el qorǵany bolýǵa tárbıeleıtin biregeı alań», - dep atap ótti Qasym-Jomart Toqaev.
Óskeleń urpaqty tárbıeleý máselelerindegi áskerdiń ósip kele jatqan rólin esepke ala otyryp, respýblıkalyq áskerı-patrıottyq jıyn óskeleń urpaqtyń boıynda Otanymyzdy qorǵaýǵa daıyn el azamatynyń joǵary patrıottyq sezimderi men adamgershilik qasıetterin qalyptastyrýǵa yqpal etedi.
Jıynnyń basty maqsaty - Qazaqstan Respýblıkasynda jastarǵa áskerı-patrıottyq tárbıe berýdi jetildirý, áskerı qyzmetti nasıhattaý jáne Qazaqstan Respýblıkasy Qarýly Kúshteriniń bedelin arttyrý.
Jıyn barysynda jastardy qazaqstandyq patrıotızm rýhynda tárbıeleý, senimdilikti jáne joǵary adamgershilikti qalyptastyrý boıynsha ıdeologııalyq jumys júrgiziletin bolady. Áskerı-qoldanbaly sport túrleri men jaýyngerlik daıarlyq pánderi boıynsha jarystar, áskerı-dalalyq taktıkalyq oıyn, áskerı tehnıka kórmesi, óńirlerdiń áskerı-patrıottyq klýbtarynyń, áskerı-patrıottyq klýbtary daıyndaǵan ushaq, keme úlgileri, áskerı tehnıka, áskerı-patrıottyq klýbtary daıyndaǵan áskerı tehnıka, qazaqstandyq jaýyngerler shaıqasqan jerden izdeý toptarynyń eksponattary, «Aıbyn daryny» jáne «Meniń robotym» baıqaýlary ótedi. Sondaı-aq kontsertter uıymdastyrý, fılmder kórsetý, alaý janynda kesh, ınteraktıvti kontsert, sporttyq oıyndar jáne taǵy da basqa sol sekildi mádenı-saýyq is-sharalary uıymdastyrylady.
