Qaraǵandy oblysynda avtonomdyq jylytý júıesine qosylǵan barlyq kóp qabatty úıler tekseriledi
QARAǴANDY. QazAqparat - Qaraǵandy oblysynda Shahanda oryn alǵan adam qurbandary bar apattan keıin AJJ barlyq kóp qabatty úıler tekseriledi, dep habarlady oblys ákiminiń baspasóz qyzmetine silteme jasap «QazAqparat» HAA tilshisi.
Shahanda jedel shtab otyrysynda bul ókimdi óńir basshysy N. Ábdibekov berdi. Shuǵyl qyzmetter, Shahtınsk ákiminiń TKSh salasy jetekshileriniń, polıtsııanyń esepteri tyńdaldy.
«Ákim AJJ jáne qazandyǵy bar barlyq kóp qabatty úıdi tekserýdi, personalǵa qosymsha nusqaý júrgizýdi tapsyrdy. Shahan kentin ǵana emes, kúlli oblystaǵy osyndaı jylý kózderi bar úıler tekserilýi qajet», - delingen habarlamada.
Shahanda 60 páterli úıde qazandyq jarylyp, kireberis qulady. Ony Qazaqstandyq kóp beıindi qaıta jóndeý jáne damý ınstıtýtynyń sarapshylary tekseredi.
«Qazir vızýaldy qaraldy. Eki kúnde aspaptyq jumystar aıaqtalady dep josparlanýda, - dedi QKQDI dırektory J. Nuǵujınov. - Úıden basqa qaýipti aqaý tabylmady. Túsirilimdi, ózgeris serpinin, barlyq toraptardy qaıta qarap shyǵýmyz qajet. Taıaýda qorytyndysy ázir bolady».
Úıdi odan ári paıdalaný sheshimi sarapshylardyń usynysymen qabyldanady.
«Qıraǵan bólik komıssııa qorytyndysynan keıin ǵana jóndeledi», - delingen habarlamada.
Tehnogendik sıpattaǵy TJ saldarynan keltirilgen shyǵyndy baǵalaý úshin arnaıy komıssııa quryldy.
Aıta keteıik, 1 qańtar kúni 22 saǵat 40 mınýttar shamasynda Qaraǵandy oblysynyń Tótenshe jaǵdaılar departamentine Shahan kentinde kópqabatty úıdiń qulaǵany jóninde arnaıy habar kelip túsken. Oqıǵa ornynan tótenshe jaǵdaılar qyzmetiniń kúsh-qurylymdary men arnaıy tehnıkalary jóneltilip, turǵyndardy evakýatsııalaý jumystary júrgizildi.
Shahan kentiniń ákimdigi janynan 8 (72156) 3-24-17 nómiri boıynsha, jedel jeli qyzmeti uıymdastyryldy.
