Qaraǵandy oblysynda avtobýs jáne arnaıy tehnıka shyǵaratyn zaýyt ashylady

QARAǴANDY. QazAqparat – Qaraǵandy oblysyna jumys saparymen Premer-Mınıstr Asqar Mamın keldi. «Saryarqa» EEA-na barǵan kezde Úkimet basshysyna Yutong markaly avtobýstar men arnaıy tehnıka shyǵaratyn jańa zaýyttyń jobasy tanystyryldy, dep habarlaıdy QazAqparat tilshisi.

Kásiporyn Saranda, burynǵy RTB zaýytynyń aýmaǵynda ashylady. Premer-Mınıstrdiń qatysýymen ákimdik pen ınvestıtsııalyq konsortsıým arasynda jańa zaýyt qurý jónindegi kelisimge qol qoıyldy.

Bıylǵy jyly alǵashqy avtobýs shyǵarý josparlanyp otyr. Jyl sońyna deıin birinshi kezeńdi iske asyrý aıaqtalady. Budan ári joba jalǵasyn tabady.

Jańa kásiporynǵa jumyldyrylǵan tikeleı jáne tartylǵan ınvestıtsııalardyń jalpy somasy shamamen 23 mıllıard teńgeni quraıdy. Joba qolda bar RTI ǵımarattaryn qaıta jańartýdy, sondaı-aq jańa óndiristik obektilerdi salýdy kózdeıdi. Sondaı-aq joǵary tehnologııalyq dánekerleý jáne syrlaý jabdyqtaryn satyp alý josparlanǵan.

Joba aıasynda 1 100 jumys ornyn ashý josparlanýda. Zaýyttyń jyldyq jobalyq qýaty - 1 200 avtobýs jáne 500 arnaıy tehnıka shyǵarý. Ónim el ishinde satylatyn bolady, sondaı-aq jaqyn shetelderge eksporttalýy múmkin.

Qaraǵandylyq JOO-lar avtomobıl jasaý úshin kadrlar daıarlaıtyn bolady dep boljanýda. Ýnıversıtetterde beıindik bilim berý baǵdarlamalary iske qosylady.

Kásiporyndy qurý Qaraǵandy oblysy ákimdiginiń, «BRK-Lızıng» AQ jáne «Saryarqa» ÁKK» AQ qatysýymen jáne qoldaýymen júzege asyrylady.