Qaraǵandy oblysynda aýylsharýashylyq salasyna avtomattandyrylǵan baqylaý júıesi engizilip jatyr
ASTANA. QazAqparat - Qaraǵandy oblysynyń ákimi Erlan Qoshanov jumys saparymen Buqar Jyraý jáne Osakarovka aýdandarynda bolyp, kóktemgi egis barysymen tanysyp qaıtty, dep habarlaıdy oblystyq ákimdiktiń baspasóz qyzmeti.
Aýa raıynyń qolaısyzdyǵy egin egý jumystaryn sál kesheýildetkenine qaramastan, dıqandar bekitilgen merzim ishinde barlyǵyn rettep, 1 maýsymǵa deıin dán sebý jumystaryn aıaqtaýǵa tyrysyp jatqandaryn aıtty.
Qaraǵandy oblysynda bıylǵy jyly 823 myń ga aýmaqqa egin salynady dep josparlanýda. Onyń ishinde dándi-daqyldary jáne burshaq daqyldylary - 748 myń ga, maıly daqyldar - 14 myń ga, jemdik daqyl - 43 myń ga jerge egiledi. Sonymen qatar kartop 9,1 myń ga, kókónister - 1,4 myń ga aýmaqqa otyrǵyzylady dep josparlanýda. Egis kampanııasyna 20 myń aýylsharýashylyq tehnıkasy, onyń ishinde 5600 traktor, 162 egin keshenderi jáne 6 000 dán sepkish mashınalar jumyldyryldy. Búgingi kúnge josparlanǵan jumystyń 65-75% oryndaldy.
Buqar Jyraý aýdanynda obys ákimi «PK ım.Kırova» JShS, «Nur-SH» JShS-niń kartop jáne dándi-daqyl alqaptarynda, sonymen qatar Qaraǵandy ósimdiktaný jáne selektsııa ǵylymı-zertteý ınstıtýtynyń («QÓSǴZI» JShS) tájirıbelik alqaptarynda bolyp qaıtty.
Erlan Qoshanov kartop egýshilerge nelikten maýsym aralyǵynda olardyń ónimderiniń baǵasy sharyqtap ketetini týraly surady. «Birinshi kezekte, oblys qajettilikterin óteý kerek, sodan keıin ǵana ónimdi syrtqa shyǵarý kerek», - dep atap ótti ol.
Dánderdi zertteýdi damytý máselesi ınstıtýt mamandarymen talqylandy. «QÓSǴZI» JShS dırektory Damır Qaldybav bul maqsattarǵa shamamen 70 mln. teńgege jýyq qosymsha qarjy qajet ekenin jetkizdi. Oblys ákimi bul máseleni QR Aýylsharýashylyq mınıstrligimen talqylaýdy usyndy.
Sonymen qatar, ınstıtýt qus ósirýmen aınalysýdy josparlap otyr. Qazdar men úırekterdi ósirý jobasyn qurǵan.
«Ósimdik ósirýge keler bolsaq, biz barlyǵyn avtomattandyrmaqpyz. Bıylǵy jyly 1S-Agro júıesin pılottyq rejımde iske qosamyz. Bul júıe barlyq óndiris ýchaskilerin basqarý ortalyǵyna shoǵyrlandyrady. Biz egisti, dán qoımalaryn, JJM kólemin qadaǵalap otyramyz. Osy jyly alqaptardy seriktik júıemen baqylaýǵa kelesimshart jasadyq», - deıdi Damır Qaldybaev.
Osakarovka aýdanyna oblystyń barlyq egis alqaptarynyń úshten bir bóligi tıesili. «Osy jyly dándi-daqyldar 291 myń ga jerge egiledi. Ol 2016 jylmen salystyrǵanda12 800 gektarǵa kóbirek. Al ótken jyly biz egisti 36 myń gektarǵa ulǵaıtqan bolatynbyz. Jazǵy egis te ulǵaıdy, al kortop egý tómendep ketti. Sebebi sýarý qurylǵylaryn ázirlep úlgermedik, - dep esep berdi oblys ákimi aldynda aýdan basshysy Qaırat Shaıjanov. - Egis jumystaryn 1 maýsymǵa deıin aıaqtaýdy josparlap otyrmyz. Qazirgi tańda josparlanǵan jumystyń 60% oryndaldy».
