Qaraǵandy oblysynda aýylishilik joldardyń sapasy tekserildi
QARAǴANDY. QazAqparat – Qaraǵandy oblysynyń Egindibulaq eldi mekeninde aýylishilik joldardy jóndeý qolǵa alyndy. Ortasha jóndeýmen 70% jol qamtylatyn bolady. Qarajat «Aýyl – El besigi» baǵdarlamasy boıynsha bólindi. Bul qarjyǵa joldardyń 50%-dan astamy asfalttaldy. Merdiger kompanııa jumysty qazan aıynyń sońyna deıin aıaqtaýǵa ýáde berýde, dep habarlaıdy QazAqparat tilshisi.
Oblys ákimi Jeńis Qasymbek Egindibulaqta jumys saparymen bolyp qaıtty. Óńir basshysyn DSK qurylysy, jóndelgen joldardyń sapasy jáne basqa da birqatar máseleler qyzyqtyrdy.
Esterińizge sala keteıik, Egindibulaq turǵyndary birneshe ret bılikten buqaralyq sportpen aınalysýǵa jaǵdaı jasaýdy ótingen bolatyn. Bıyl másele sheshildi. 100 oryndyq trıbýnasy bar DSK qurylysy bastaldy. Munda boks, kúres, fıtnes zaldary jáne fýtbol alańy bolady. Keshen zamanaýı sport jabdyqtarymen jabdyqtalǵan. Bul quraldar sportshylardyń jattyǵýyna barlyq jaǵdaı jasaıdy.
Qazir metall konstrýktsııalaryn montajdaý jáne monolıtti qabyrǵalardyń qurylysy júrip jatyr. Nysandy 2022 jyly paıdalanýǵa berýge ýáde etilgen.
Sondaı-aq, Jeńis Qasymbek jergilikti turǵyndarmen kezdesip, aýyldaǵy bolyp jatqan ózgeristerdi talqylady. Aqsaqaldar Egindibulaqtyń qysqa ýaqyt ishinde aıtarlyqtaı ózgergenin atap ótti. Mektep pen mádenıet úıi jóndeldi, aýlalar abattandyrylýda, balalar alańdary ornatylýda, kósheler jaryqtandyrylýda, joldarǵa kóńil bólinýde.
Sapar sońynda oblys ákimi jol jáne sport kesheni qurylysshylaryna barlyq jumystardy jedeldetip, merziminde aıaqtaýdy tapsyrdy.
