Qaraǵandy oblysynda aýylǵa baryp jumys istegen dárigerge 5 mln teńge kómek beriledi

QARAǴANDY. QazAqparat – Qaraǵandy oblysy Novoýzenka aýylynyń turǵyndary endi zamanaýı feldsherlik-akýsherlik pýnktide medıtsınalyq kómek alady. Jergilikti turǵyndar úshin bul - kópten kútken oqıǵa, dep habarlaıdy QazAqparat tilshisi.

«Men osy aýylda týyp-óstim. 40 jyldan astam ýaqyt boıy qajetti jaǵdaıy joq feldsherlik-akýsherlik pýnkte emdelip kelemiz. Naýqastar úshin ǵana emes, qyzmetkerler úshin de jaǵdaı jasalmaǵan. Bizdiń medıtsına qyzmetkerlerimiz jaqsy, olar bizge kómektesýge árqashan daıyn, biraq olar osyndaı jaǵdaıda jumys isteýge májbúr. Sondyqtan kóp jyldar boıy bizge jańa FAP salýdy suradyq. Mine, bizdiń ótinishimizge qulaq túrip, salyp berdi», – deıdi aýyl turǵyny Svetlana Kıstanova.

Jańa FAP-ta zamanaýı fızıokabınet, kúndizgi statsıonar, áleýmettik dárihana bolady. Qazirdiń ózinde barlyq qajetti ınfraqurylym qosylǵan.

Eki jyl ishinde Qaraǵandy oblysynda 92 aýyldyq densaýlyq saqtaý nysany salynady. 69 medıtsına qyzmetkeri jumysqa ornalasady.

Olardy «Dıplommen – aýylǵa» baǵdarlamasy boıynsha jumyldyrady.

Mindetti kóterme qarajattan bólek, jas mamandarǵa bıyl alǵash ret qosymsha qarjylandyrý – 1,5 mln teńgeden 5 mln teńgege deıin qoldaý kórsetiletin bolady.

«Oblys ákiminiń sheshimi boıynsha biz olardy laıyqty kóterme qarajatpen qamtamasyz ete alamyz. Jalpy praktıka dárigeri, terapevt, pedıatr, anestezıolog, reanımatolog sııaqty suranysqa ıe mamandar úshin kóterme qarjy 5 mln teńge bolady. Beıindi mamandar – kardıologtar, nevropatologtar, hırýrgtarǵa – 3,5 mln teńge, orta medıtsına qyzmetkerleri men farmatsevter úshin – 1,5 mln teńge», – deıdi densaýlyq saqtaý basqarmasynyń basshysy Bıbigúl Tólegenova.

Sondaı-aq, aýyl turǵyndaryna sapaly shuǵyl medıtsınalyq kómek kórsetý úshin Temirtaý jáne Balqash medıtsınalyq mekemeleriniń bazasynda kópsalaly ortalyq aýdandyq aýrýhanalar ashylady.