Qaraǵandy oblysynda aýyldyq balabaqsha ashyldy
QARAǴANDY. QazAqparat - Buqar Jyraý aýdanyndaǵy Kókpekti aýylynda 100 orynǵa shaqtalǵan «Nur-sábı» balabaqshasy ashyldy. Bul aımaǵymyzdaǵy aýyldyq jerde memlekettik-jekemenshik áriptestik jelisi boıynsha júzege asyrylǵan alǵashqy joba, dep habarlaıdy QazAqparat ákimniń saıtyna silteme jasap.
«Aýyl turǵyndary burynnan beri balabaqsha ashý kerektigi týraly aıtyp kelgen bolatyn. Men MJÁ týraly bildim de, mehanızmmen tanysyp, oblys ortalyǵynda júzege asyrylǵan jobalardy qarap shyqtym. Kásipkerler palatasynyń aýdandyq fılıalynda maǵan bıznes-jospar qurýǵa kómektesti. Jergilikti atqarý organdary men Oblystyq bilim basqarmasy qoldaý kórsetti, - deıdi kásipker Torǵaı Maǵzumova.
Bıznes-výmen tıimdi jumyspen qamtý jáne jjapaı kásipkerlik baǵdarlamasy boıynsha aýyl sharýashylyǵyna qarjylaý qoldaý kórsetý qorynan 9,7 mln teńge kóleminde nesıe alǵan. Nesıe sharty qolaıly - jyldyq mólsherleme 6 paıyz, merzimi 5 jyl.
Burynǵy balabaqsha ǵımaraty jóndelip, maqsatty qoldanylyp otyr. Jańa «Nur-sábı» balabaqshasy óz esikterin tamyz aıynyń basynda aıqara ashty. Qazir oǵan 40 bala baryp júr, qabyldaý jalǵasýda.
Toptarda tárbıe eki tilde beriledi - qazaqsha jáne oryssha. Sońyra aǵylshyn tili qosylady. Balabaqshaǵa jergilikti turǵyndar jumysqa qabyldanǵan.
Aýdandyq bilim bólimi jekemenshik balabaqshaǵa 100 orynǵa memlekettik tapsyrys berip otyr. Memleket bir balaǵa aıyna 29 900 teńge tólep otyrady. Osynyń arqasynda ata-analarǵa aı saıynǵy ótemaqy shamamen 11 000 teńgege shyǵatyn bolady.
