Qaraǵandy oblysynda aýyl turǵyny 81 jastaǵy anasyn tonady
Qaraǵandy oblysy Buqar jyraý aýdanynyń polıtsııasyna eldi mekenderdiń biriniń 64 jastaǵy turǵyny júgindi.
Aýyl turǵyny belgisiz adam úıge kirip, quny 40 myń turatyn bolgarkany urlap ketkenin aıtty.
Jedel-izdestirý sharalary barysynda polıtseıler kúdiktini – 25 jastaǵy er adamdy anyqtap, ustady.
Ol jábirlenýshiniń úıine qulyp salynbaı ashyq turǵan esikti paıdalanyp kirgenin aıtyp, urlyǵyn moıyndady.
Al urlanǵan elektr quralyn óz maqsatynda paıdalanǵan. Zattaı dálel-bolgarka tárkilenip alyndy.
Birneshe saǵattan keıin Buqar jyraý aýdanynyń polıtsııasyna basqa aýylda turatyn 63 jastaǵy áıelden aryz tústi.
Zeınetkerdiń aıtýynsha, ol úıge kiretin esikti qulyptap kórshilerine barǵan. Ol úıge qaıtyp kelgende úıine belgisiz bireý kirip, urlyq jasaǵanyn anyqtaǵan. Kirgen adam ámııandy urlap ketken.
Polıtseıler jábirlenýshiniń 64 jastaǵy aýyldasyn «izin sýytpaı» ustady.
Biraz ýaqyttan keıin polıtsııaǵa 81 jastaǵy zeınetker qońyraý shaldy. Anyqtalǵany, áıel dúkenge barǵan kezde belgisiz bireý úıden uıaly telefonyn urlap ketken.
Jedel-izdestirý sharalary barysynda polıtsııa qyzmetkerleri kúdiktini anyqtap, ustady. Ol ótinish berýshiniń 42 jastaǵy uly bolyp shyqty. Zattaı dálel - uıaly telefon tárkilenip alyndy.
Barlyq faktiler boıynsha QR QK 188-baby boıynsha qylmystyq is qozǵaldy. Tergeý amaldary júrip jatyr.