Qaraǵandy oblysynda aýyl turǵyndary úshin medıtsınalyq qyzmetter qoljetimdirek bola tústi
QARAǴANDY. QazAqparat - Abaı aýdanynyń 100-den astam turǵyny osy aıdyń basynan kompıýterlik tomografııadan tegin tekserýden ótti, dep habarlaıdy QazAqparat tilshisi.
Ortalyq aýdandyq aýrýhanada patsıentterge ońaltý emi júrgiziledi, al medıtsınalyq mekemeniń salalyq mamandary anyqtalǵan patologııasy bar oqýshylardy tekserý úshin aýdannyń barlyq aýyldaryn aralap shyqty. Osynyń barlyǵy medıtsınalyq saqtandyrý júıesiniń pılottyq jobasy sheńberinde bólingen qosymsha qarajattyń arqasynda múmkin boldy.
Abaı aýdanynyń ortalyq aýrýhanasynyń emdelýshileri endi Topar kentinde ońaltýdan ótý múmkindigine ıe boldy. Medıtsınalyq mekemede táýlik boıǵy statsıonar - kardıologııalyq baǵyttaǵy, nevrologııalyq, meıirbıkelik kútim jáne pallıatıvtik kómek kórsetiletin oryndar ashyldy. Emdelýshilerge massaj jáne EDSh kýrsynan kúndizgi statsıonarda ótýge bolady. Aýrýhanaǵa medıtsınalyq saqtandyrýdy engizýdiń pılottyq jobasy aıasynda 2,6 mln teńge bólindi. 2020 jyldan bastap medıtsına qyzmetkerleri emhanada da, úıde de ońaltý qyzmetterin kórsetetin bolady. Aýdandyq aýrýhananyń dırektory Natalıa Belannyń aıtýynsha, búgingi tańda qalpyna keltirý emin qajet etetin adamdar sany kóp.
«Bizge áli de jabdyqtar satyp alý qajet. Osydan keıin, qosymsha, ambýlatorııalyq deńgeıde de ońaltýdy bastaımyz. Bizdiń aýdandyq aýrýhanada oǵan degen qajettilik bar. Emdelýshiler óte qýanyshty bolady. Buryn olar Qaraǵandyda ońaltýdan ótti, al munda barlyǵy úıden alys emes, eshqaıda barýdyń qajeti joq», - dep qosty Natalıa Belan.
Medıtsınalyq mekemege óz betinshe jete almaıtyn adamdarǵa dárigerler ózderi keledi. Medbıke Berdigúl Álpilám ýchaskige tirkelgen 1 407 turǵynnyń 75-i az qozǵalatyn naýqastar. Ol emhanada qabyldaý ótkizgen soń kún saıyn 4-5 adamdy aralap shyǵady. Vasılıı men Lıdııa Ageevterdiń úıine Berdigúldiń 7 jyl boıy jıi kelip otyrady. Vasılıı Vasılevıchtiń júregi aýyrady – oǵan qan tamyryna dári egip, tegin dárilerin alyp kelý kerek.
«Medbıke bizdiń barlyq ótinishimizge birden jaýap beredi. Jáne taldaýlar qajet bolǵan jaǵdaıda úıden kelip alady, qan qysymymyzdy, qant, holesterındi ólsheıdi. Medbıkemiz barlyǵyna da osyndaı jyly shyraı tanytady. Kórshiler de oǵan rıza», - deıdi Topar turǵyny Lıdııa Ageeva.
Aýdan turǵyndary onkologııaǵa kúdik týyndaǵanda, sozylmaly aýrýlar kezinde kompıýterlik tomografııadan tegin ótý úshin medıtsınalyq uıymǵa taǵy 3,4 mln teńge bólindi. Bul múmkindikti 100-den astam aýdan turǵyny paıdalandy.
Topar kenti men jaqyn aýyldar turǵyndarynyń kásibı tekserýge júginýi artty. Buryn dárigerler aýyldarǵa jylyna eki ret baryp turatyn. Osydan keıin patologııalary anyqtalǵan turǵyndar ózderi aýdandyq aýrýhanaǵa qaralýǵa jáne emdeý úshin kelýi tıis bolatyn. Endi qandaı da bir sebeptermen muny isteı almaǵandarǵa salaly mamandar ózderi barady. Qazan aıynyń basynan dárigerler barlyq aýyldarda bolyp qaıtty.
«Oqýshylardy Toparǵa aparýdyń qajeti joq. Bizdiń mamandar kelip, qarap shyǵady, sol kezde analızder alady. Dáriger qorytyndy jasaıdy jáne em taǵaıyndaıdy. Buryn dárigerler tek kásibı tekserister ótkizý úshin ǵana shyǵatyn, al em taǵaıyndaý qaǵazdaryn alý úshin naýqastardyń ózderi keletin, keıbiri ózderi de kelmeı, balalaryn da alyp kelmeıtin. Endi biz halyqtyń osy bóligin qamtıtyn bolamyz», - deıdi Natalıa Belan.
Abaı aýdanynyń ortalyq aýrýhanasyna medıtsınalyq saqtandyrýdy engizýdiń pılottyq jobasy aıasynda 36 mln teńgeden astam qarjy bólindi.
«Biz úshin pılottyq joba boıynsha bólingen aqsha aıtarlyqtaı qomaqty. Jyl sońynda bizge únemi aqsha jetispeıtin. Biz barlyǵyn ıgerip, jalaqy tóleımiz, jyldy nátıjeli jabamyz jáne patsıentterdi ońaltý úshin qajetti jabdyqtardy satyp alýǵa bizde áli de aqsha qalady dep esepteımiz», - dep atap ótti aýdandyq aýrýhananyń dırektory.
