Qaraǵandy oblysynda aýyl turǵyndary sport zalyn qalpyna keltirip, jańa medpýnkt salýdy ótindi
QARAǴANDY. QazAqparat – Bıyl Qaraǵandy oblysy Buqar Jyraý aýdanynyń Qyzyljar aýylynda jańa feldsherlik-akýsherlik pýnkt salynady. Rostovka eldi mekeninde barlyq aýylishilik joldar asfalttalady. Aýdanǵa jumys sapary barysynda Qaraǵandy oblysynyń ákimi Jeńis Qasymbek jergilikti aýyl qoǵamdastyqtarynyń belsendilerimen kezdesip, olardy qandaı máseleler tolǵandyratynyn bildi, dep habarlaıdy QazAqparat tilshisi.
Qyzyljarda 800-den astam adam turady. Medpýnkt pen feldsher bar. Alaıda 1964 jyly salynǵan ǵımarat uzaq ýaqyttan beri kúrdeli jóndeýdi qajet etýde.
Óńir basshysy aýyl turǵyndaryn qýantty. Bıyl jańa feldsherlik-akýsherlik pýnkttiń qurylysy bastalady.
Sondaı-aq, aýylda sport zaly joq. Sportpen aınalysýǵa arnalǵan ǵımaraty burynnan qańyrap bos tur. Oblys ákimi ony tezirek jóndeýdi tapsyrdy. JSQ ázirleýge konkýrs jarııalandy. Qalpyna keltirilgennen keıin aýyl turǵyndary sportpen shuǵyldanýǵa múmkindik alady.
«Men bul aýylda bala kezimnen turamyn. Kúrespen aınalysamyn. Bul sportzal buryndary jumys istegen, men ózim osynda shuǵyldandym. Bul jerden kóptegen chempıondar túlep ushqan. Qazir aýylda sportzal joq, balalardyń aınalysatyn jeri joq. Biz bul ǵımarat qalpyna keltiriletinine, oblys ákimi usynǵan sheshimge qýandym», – dep bólisti Qyzyljar turǵyny Amangeldi Esenǵalı.
Qyzyljarda ortalyq sý qubyrynyń qurylysy aıaqtalýda. Qazirgi ýaqytta jumystyń 80%-y jasaldy. Nysan bıyl paıdalanýǵa berilýi tıis.
Rostovka aýylynda Jeńis Qasymbek kentishilik joldardyń aǵymdaǵy jóndelýimen tanysty. Joldyń 700 metrin asfalttaý, sý ótkizý qubyrlaryn ornatý jáne jol jıekterin tógý jumystary qaldy. Olardy aıaqtaýǵa «Aýyl – El besigi» baǵdarlamasy boıynsha qarajat bólindi. Jospar boıynsha aýyldyń barlyq kósheleri bıyl asfalttalady.
Sondaı-aq, «Aýyl – El besigi» baǵdarlamasy boıynsha 2021 jyly Rostov tirek mektebi janyndaǵy ınternaty kúrdeli jóndeýden ótti. Alaıda turǵyndar jumys sapasyna shaǵymdandy.
Jeńis Qasymbek júrgizilgen jumysty jedel baǵalaıtyn komıssııa qurýdy tapsyrdy. Eger kemshilikter anyqtalsa, merdiger olardy úsh jylǵa jaramdy kepildik aıasynda joıýy tıis.
Aýyl turǵyndary mal jaıý úshin jaıylymdardyń jetispeýshiligi týraly da aıtty. Bul máselege qatysty turaqty túrde jumystar atqarylýda, alaıda ol ózekti bolyp qalyp otyr. Ony jer zańnamasy aıasynda sheshetin bolady.
