Qaraǵandy oblysynda aýyl sharýashylyǵy kolledjiniń stýdentterine jataqhana salynady

QARAǴANDY. QazAqparat - Memleket basshysynyń áleýmettik bes bastamasynyń aıasynda Qaraǵandy oblysynyń Qarqaraly aýdanynda 2019 jyly 100 adamdyq jańa jataqhananyń qurylysy bastalady, dep habarlaıdy QazAqparat tilshisi.

«Qazirgi tańda jobalaý-smetalyq qujattardy ázirleýge jáne memlekettik saraptamadan ótýge oblystyq bıýdjetten qarajat bólindi. Baıqaý jarııalandy. Qurylys 2019 jyly bastalady dep josparlanǵan. Qurylystyń naqty somasy áli anyqtalmady. Memlekettik saraptama nátıjelerin kútip otyrmyz. Kolledjdi turǵyzýmen qurylys basqarmasy aınalysady. Biz tek basqarmaǵa jataqhanaǵa muqtaj ekendigimizdi jetkizip, ótinish jazamyz.», - dedi Qaraǵandy oblysy bilim basqarmasynyń materıaldyq-tehnıkalyq damytý bóliminiń basshysy Raýan Raıymbek.

Myńjasar Ádekenov atyndaǵy Qarqaraly aýylsharýalyshyq kolledjinde 325 stýdent oqıdy. Kóbisi aýdanǵa shalǵaı aýyldardan, tipti ózge oblystardan da kelip oqyp jatyr.

Jobalaý-smetalyq qujattardy ázirleýge 15 mıllıon teńge bólindi. Jataqhananyń qurylysyna kolledj mańynan jer bólindi. Keleshekte bul jerde jergilikti kolledjdiń 100 stýdentine arnalǵan 4 qabatty jataqhana bolady.

Sonymen qatar, bolashaqta Qaraǵandydaǵy kólik-tehnologııa kolledjiniń stýdentterine arnalǵan jataqhana qurylysy bastalady. Qaraǵandy memlekettik tehnıkalyq ýnıversıteti men Medıtsınalyq akademııanyń kolledjderiniń stýdentteri úshin de jataqhanalar salynady. Qaraǵandy oblysynda jalpy 70-ten astam kolledj bar.