Qaraǵandy oblysynda aýyl muǵalimi mekteptiń kerek-jaraǵyna grant utyp aldy

QARAǴANDY. QazAqparat – Qaraǵandy oblysy Buqar Jyraý aýdany Krasnaıa Nıva aýylynyń muǵalimi Lıdııa Gýra mıllıon teńge grant ıegeri atandy, dep habarlaıdy QazAqparat tilshisi.

Onyń bilim berý úderisin jáne oqýshylardyń synyptan tys qyzmetin jaqsartý boıynsha jobasy Barine Bilim muǵalimderine arnalǵan shaǵyn granttar baǵdarlamasynyń fınalısteri tizimine endi.

Bastaýysh synyp muǵalimi Lıdııa Gýranyń bastamasy mekteptiń sportzalyn jabdyqtaýǵa baǵyttalǵan. Aýylda bir ǵana oqý orny bar. Orta mektepke 50 oqýshy barady, taǵy 6-ýy mektepaldy daıarlyq synybyna barady. Muǵalimniń aıtýynsha, sportzalda qural-jabdyqtar jetispedi.

«Men osy aýylda dúnıege keldim. Qazir ózim sabaq beretin mektepte oqydym. Anam da osy jerde muǵalim bolyp jumys istedi. Men týǵan jerimdi jáne mektepti shyn júrekten jaqsy kóremin. Balalarymyzdyń deni saý, myqty jáne shydamdy bolǵanyn qalaımyn. Mekteptiń sport zaly – bul balalar sportpen shuǵyldanatyn jalǵyz oryn. Biraq bizde ınventar jetispedi. Sondyqtan meniń jobam osyǵan arnaldy», – dedi Lıdııa Gýra.

Granttyń arqasynda sportqa arnalǵan taýarlar men jabdyqtar satyp alyndy. Bul mattar, kilem jáne qazaq kúresine arnalǵan kımono, ústel tennısine arnalǵan barlyq kerek-jaraqtar – ústel, torlar, raketkalar men sharıkter, sondaı-aq trenajerler, týrnıkter, qyrly bóreneler men arqandar. Sondaı-aq voleıbol, basketbol jáne fýtbolǵa arnalǵan jabdyqtar satyp alyndy. Zııatkerlik oıyndardy unatýshylar da umyt qalmaǵan - shahmat pen toǵyzqumalaq alyndy.

Barlyq qural-jabdyqtar mekteptke jetkizildi. Endi oqýshylar dene shynyqtyrý sabaqtaryna qýana qatysady. Sporttyq úıirmeler de ashylady.

Al Lıdııa Gýranyń jańa armany bar. Ol mektepte fızıka, hımııa jáne bıologııa sabaqtaryna qajetti jabdyqtardyń bolýyn qalaıdy.