Qaraǵandy oblysynda aýyl mektepteri taǵy 8 jańa avtobýs aldy

QARAǴANDY. QazAqparat – Qaraǵandy oblysynda aýyl mektepteriniń avtoparki taǵy segiz jańa avtobýspen tolyqty. Yńǵaıly kólik jol qaýipsizdigi talaptaryna jaýap beredi, dep habarlaıdy QazAqparat tilshisi.

Aýyldyq mektepterdiń avtoparkin tolyqtyrý týraly bilim basqarmasynyń basshysy Gúlsim Qojahmetova áleýmettik jelidegi paraqshasynda jazdy.

«Qaraǵandyǵa Almaty qalasynyń Hyundai Trans Auto zaýytynda jasalǵan segiz jańa qyryq oryndyq mektep avtobýsy keldi. Bul Abaı, Buqar Jyraý, Qarqaraly, Shet aýdandary men Temirtaý qalasynyń Aqtaý kentiniń balalaryn qaýipsiz tasymaldaýdy qamtamasyz etedi», - deıdi Gúlsim Qojahmetova.

Ótken jyldan bastap aýyl mektepteri 27 zamanaýı avtobýs aldy.

Olar qarjy lızıngi baǵdarlamasy boıynsha jeńildikti sharttarmen satyp alyndy jáne qazirgi zamanǵy talaptarǵa jaýap beredi.

Atap aıtqanda, qaýipsizdik belbeýimen, mektep rıýkzaktaryna arnalǵan sóremen, avtobýs esikteri ashylǵanda qozǵalysty buǵattaý mehanızmimen jabdyqtalǵan, jyldamdyqty 60 km/saǵ deıin shektegish bar.

Esterińizge sala keteıik, buǵan deıin QazTehna zaýytynyń 19 jańa mektep avtobýsyn Abaı, Buqar jyraý, Qarqaraly, Osakarov, Shet aýdandary men Aqtaý kentiniń aýyl mektepteri alǵan bolatyn.

Jańa tehnıkanyń arqasynda aýyl mektepteriniń oqýshylary olımpıadalarǵa, sporttyq jarystarǵa jáne basqa da is-sharalarǵa jıi bara alady.