Qaraǵandy oblysynda aýyl ákimi saılaýyna 268 kandıdat túsip jatyr

QARAǴANDY. QazAqparat – Qaraǵandy oblysynda 75 aýyl ákimi laýazymyna 268 adam úmitker bolyp otyr. Saılaýǵa kandıdattardy tirkeý aıaqtaldy. 15 shildede úgit naýqany bastaldy, dep habarlaıdy QazAqparat tilshisi.

Oblysta aýyl ákimderiniń alǵashqy tikeleı saılaýyna 303 kandıdat – 216 ózin-ózi usynǵan jáne saıası partııalardan 87 kandıdat usynyldy.

Tekserý nátıjeleri boıynsha 25 úmitker memlekettik qyzmet talaptaryna sáıkes kelmegendikten bas tartyldy.

Toǵyz adam kandıdatýracyn óz erkimen alyp tastady.

«Aýmaqtyq saılaý komıssııalarymen 268 kandıdat tirkeldi, olardyń 187-si – ózin-ózi usynýshylar, 81-i – partııa ókilderi. Ortasha alǵanda, básekelestik bir orynǵa 3,5 adamdy quraıdy. Saılaý tartysyna 5–6 úmitker qatysatyn okrýg bar», – dep habarlady oblystyq saılaý komıssııasy.

Tirkelgen kandıdattardyń ishinde 226 (84%) - er adam jáne 42 (16%) - áıel adam. Barlyǵynyń joǵary bilimi bar. Ortasha jasy 40-tan sál asady.

Mamandyǵy boıynsha zańgerler men ekonomıster basym. Keı úmitkerlerdiń aýylsharýashylyq mamandyqtary bar.

Esterińizge sala keteıik, Qaraǵandy oblysynda aýyl ákimderiniń alǵashqy tikeleı saılaýy 25 shildede ótedi. Ol 149 eldi mekende uıymdastyrylady. 75 aýyl ákimin saılaý kerek.

Bolashaq aýyl basshysyna 81 myńnan astam saılaýshy daýys bere alady.

Saılaýdy ótkizýge 164 saılaý komıssııasy – 15 aýmaqtyq jáne 149 ýchaskelik komıssııa jumyldyrylady.