Qaraǵandy oblysynda Áýlıe Ata úńgiri jazýlar men graffıtıden tazartyldy
QARAǴANDY. QazAqparat – Qaraǵandy oblysy Aqtoǵaı aýdany Shashýbaı kentiniń muǵalimderi Áýlıe-Ata úńgirine óziniń alǵashqy kelbetin qaıtardy.
Bes aı aralyǵynda pedagogtar tynymsyz eńbektendi. Іzgi istiń aıaqtalǵany týraly joba bastamashysy oblystyq máslıhattyń depýtaty Aıman Túkbaeva óziniń Facebook-tegi paraqshasynda aıtyp berdi, dep habarlaıdy QazAqparat tilshisi.
Bektaý Ata taýy men úńgiri Sharyn shatqaly, Han Táńiri shyńymen qatar respýblıkalyq kıeli nysandar men basqa da erekshe qasterlenetin tabıǵı mura eskertkishteriniń kartasyna kiredi. Erekshe jartastardan basqa, Shatqal Áýlıe Ata úńgirimen áıgili. Ol 600 metr bıiktikte ornalasqan. Tereńdikte úńgir qasıetti dep sanalatyn sýmen toltyrylǵan. Ǵasyrlar boıy qazaqtar munda aýrýdan aıyǵý úshin duǵa etýge kelgen.
Eki jyl buryn qazaqstandyq jelilerde týrıster jazǵan jartastar beınelengen fotolar jarııalana bastady. Jergilikti turǵyndardyń aıtýynsha, alǵashqy jazýlar ótken ǵasyrdyń 30-jyldarynda paıda bola bastaǵan. 90 jyl ishinde úńgir qalanyń usqynsyz bir aýdany ispettes bolyp, kelbetin joǵaltqan.
2020 jyly Shashýbaı kentiniń bóbekjaı kesheni bazasyndaǵy tirek mektebiniń (Resýrstyq ortalyqtyń) pedagogtary, qyzmetkerleri men tehnıkalyq personaly Áýlıe Ata kıeli úńgirin tıisti qalypqa keltirý týraly sheshim qabyldady. Jumysqa kirispes buryn eriktiler praktıkterdiń keńesterin zerttep, kóptegen tájirıbelik eksperımentterdi tikeleı úńgirde synaqtan ótkizdi. Daıyndyq kezeńi úsh aıǵa sozyldy.
«Áýlıe Ata úńgirin is júzinde tazartý bes aıǵa sozyldy: 2020 jyldyń tamyz, qyrkúıek, qazan jáne 2021 jyldyń sáýir, mamyr aılary», – dep jazady Aıman Túkbaeva.
– Demalys jáne mereke kúnderi bizdiń er azamattarymyz jany men júreginiń qalaýymen Bektaý Ata shatqalyna baryp, úńgirdi tazartty. Úńgirge bir ǵana kóterilý úshin olar ózderimen júz bir ret qoldanylatyn jáne eki turmystyq ottegi ballonyn, dızeldi shaǵyn avtonomdy generatorlyq elektr stantsııasyn, elektr şetkalary men keskishterin, órt satylaryn, týrıstik jabdyqtar men arqandardy, otpen jumys isteýdegi jeke qaýipsizdik zattaryn, qurylys quraldaryn alyp júrdi. Sonymen qatar árkimde rıýkzaktar boldy. Osylaısha bes aı boıy jumys istedik. Bul Shashýbaıdyń naǵyz jigitteri!»
«Rýhanı jańǵyrý» aıasyndaǵy aktsııa resmı túrde 6 tamyzda aıaqtaldy. Úńgirge baǵyt boıynsha jumystar aıaqtalǵannan keıin úsh tilde – memlekettik, orys jáne aǵylshyn tilderinde aqparattyq bannerler ornatyldy. Sondaı-aq, aktsııa týraly «Tabıǵat minsiz taza, min bizde ǵana» degen jazýy bar eskertkish taqta ornatyldy.
