Qaraǵandy oblysynda aýlalardy sý basý qaýpi týraly 82 habarlama tústi

QARAǴANDY. QazAqparat – Búgingi tańda Qaraǵandy oblysy aýmaǵyndaǵy sý tasqyny jaǵdaıy erekshe baqylaýda. Tótenshe jaǵdaılar departamentiniń jedel shtabyna aýla aýmaqtaryn sý basý qaýpi týraly 82 habarlama tústi, onyń 68-i baqylaýdan alyndy, dep habarlaıdy QazAqparat tilshisi.

Barlyq jaǵdaılarǵa qatysty sýdy shyǵarý boıynsha sharalar qabyldandy. Barlyǵy 80 534 tekshe metr erigen sý soryldy, sondaı-aq uzyndyǵy 1735 metr aryqtarǵa tazartý júrgizildi, 670 dana qap tóseldi, 120 metr ýaqytsha úıindiler jasaldy.

Kelesideı kúshter men quraldar jumyldyryldy:

– TJD – 209 qyzmetker, 82 birlik tehnıka, 13 motopompa;

- №52289 ÁB – 30 áskerı qyzmetshi, 1 tehnıka;

- jergilikti atqarýshy organdardan – 155 qyzmetker, 74 tehnıka;

- jergilikti polıtsııa qyzmeti – 5 qyzmetker, 2 tehnıka;

- kommýnaldyq qyzmetter – 240 adam, 68 tehnıka.

Eldi mekenderdi sý basý tirkelgen joq.

4 sáýirde Qaraǵandy oblysynyń aýmaǵynda qardyń qarqyndy erýinen Qarqaraly jáne Buqar Jyraý aýdandaryndaǵy avtojoldardyń eki ýchaskesinde sý basý faktileri tirkeldi.

Buqar Jyraý aýdanynda sý basý jaǵdaıy qysqa merzimdi sıpatta boldy. Joldardyń boıyna eskertý belgileri ornatylyp, jol qyzmetteriniń, jergilikti polıtsııa qyzmetiniń jáne TJD bólimsheleriniń kezekshiligi uıymdastyryldy.

Bul ýchaskede kóliktiń barlyq túrleri úshin qozǵalys saǵat 07:00-den bastap ashyq. Jol ústimen sýdyń asýy toqtady. Eldi mekenderge qaýip tónip turǵan joq.

Al Qarqaraly aýdanynda Qoıandy aýylynan 12 shaqyrym jerde, Qoıandy – Egindibulaq – Búrkitti oblystyq mańyzy bar avtojoldyń 67-shaqyrymynda kóliktiń barlyq túrleri úshin qozǵalys jabyq kúıinde qalyp otyr.

Oblystyń barlyq aýdandarynda 21 785 adam turatyn 158 sý tasqyny qaýpi bar eldi mekenderde 4474 turǵyn úı men aýla aýmaqtary baqylaýǵa alyndy.

Sý basqan jáne shaıylǵan avtomobıl joldary men temir joldar tirkelgen joq.

Qazgıdromettiń kún saıyn usynatyn málimetterine sáıkes, oblys ózenderiniń deńgeıi qaýipti mejeden artqan joq.

«Іri sý qoımalarynan sýdy laqtyrý jalǵasýda: Samarqandtan – 100 kýb. m/s aǵyny kezinde 20 kýb. m/s kóleminde; Yntymaqtan – 8 kýb. m/s aǵyny kezinde 80 kýb. m/s. Sherýbaı-Nura sý qoımasynan aǵyzýlar júrgizilmeıdi, aǵyny 77 kýb. m/s quraıdy.

Kosmomonıtorıng derekteri boıynsha oblystyń soltústik aýmaǵynyń 20–25% áli de qar qalyń. Qaraǵandy oblysy boıynsha sý tasqyny jaǵdaıy baqylaýda», - dep habarlady Qaraǵandy oblysy TJD baspasóz qyzmetinen.