Qaraǵandy oblysynda aýdarylǵan avtobýs jolaýshylary aıtarlyqtaı zardap shekpegen
QARAǴANDY. QazAqparat - Jolda aýdarylyp qalǵan reıstik avtobýstyń salonynda bolǵan 20 jolaýshy Qaraǵandy saparjaıyna jetkizildi, dep habarlaıdy QazAqparat tilshisi.
«Eshkim aıtarlyqtaı jaraqat almaǵan, alaıda keıbiriniń deneleri kógergen, azdap syrylǵan. Óıtkeni avtobýs aýdarylǵan kezde olardy jan jaqqa laqtyryp jibergen. Osy apat saldarynan bárimiz qorqyp qaldyq», - deıdi qalaralyq reıstiń jolaýshysy Sáýle.
Onyń aıtýynsha, oqıǵa ornyna polıtsııa tez kelip jetken ári adamdardy Qaraǵandyǵa jetkizýdi jedel uıymdastyrǵan.
Oblystyq ishki ister departamenti baspasóz qyzmetiniń basshysy Baqytjan Qudııarovtyń málimdeýinshe, jolaýshylardy evakýatsııalaýdy osy avtobýs tıesili «Avtopark № 3» JShS-nyń tehnıkalyq qyzmeti júzege asyrǵan.
«Jolaýshylar men olardyń júkteri Qaraǵandy vokzalyna jetkizildi. Eshkim qurban bolmady», - deıdi Baqytjan Qudııarov.
Eske sala ketsek , 9 aqpan kúni kúndiz Qaraǵandy oblysy Shet aýdany Qaramuryn aýyly mańyndaǵy tas jolda reıstik jolaýshylar avtobýsy jol jıegindegi jyraǵa aýdaryldy.
Oqıǵa Qarajal men Qaraǵandy arasyndaǵy kúre jolda oryn aldy. Salonda bolǵan bes bala men 15 eresek jolaýshy zardap shekken joq.
