Qaraǵandy oblysynda ashyq tásilmen kómir shyǵaratyn kásiporyn iske kiristi
QARAǴANDY. QazAqparat -Qaraǵandy óńirinde «Qaraǵandy oblysyndaǵy V.I. Lenın atyndaǵy shahtanyń jeldetý kókjıeginen joǵary ýchaskesinde D6 qabaty boıynsha tas kómir shyǵarý» ınvestıtsııalyq jobasy júzege asyryldy.
«Aq jaryq kómir» kásiporny Shahtınsk mańyndaǵy aýmaqta ashyq tásilmen kómir shyǵarýǵa kiristi, dep habarlaıdy Qaraǵandy oblysy ákiminiń resmı saıty.
Jobanyń quny 300 mln teńgeni qurady. Kásiporyn basshylyǵynyń málimdeýinshe, búgingi tańda karerde 100-ge jýyq adam jumys istep jatyr. 2017-shi jyldyń jeltoqsanynda synaq retinde 8 myń tonna kómir shyǵaryldy. Birinshi toptama sáıkesinshe sertıfıkat alý úshin ǵylymı-zertteý ortalyǵyna saraptamaǵa jiberildi.
Atqarýshy dırektor Asqar Sultanbekovtyń aıtýynsha, kásiporyn ónimin satýǵa «KazRealÝgol» JShS-men kelisimshart jasasqan. Aldaǵy ýaqytta kómirdi Reseıge eksporttaý josparlanyp otyr. 2018-shi jyly 104 myńnan astam tonna kómir shyǵarý kózdelýde.
Kómir kásipornynyń jumysymen Shahtınsk ákimi Serjan Aımaqov tanysyp qaıtty. Qala basshysy qaramaǵyndaǵy qyzmetkerlerge óndiristik máselelerdi sheshýde kómekterin kórsetýdi tapsyrdy.
Shahtınsk kómir razreziniń barlanǵan qory 1,5 mln tonnany qurap otyr.
