Qaraǵandy oblysynda altyn men mys keni tabyldy
ASTANA. QazAqparat - «Qazgelologııa» Ulttyq geologııalyq barlyq kompanııasy» AQ 2015-2017 jyldary Qaraǵandy oblysynyń Tasty men Saryadyr ýchaskelerinde júrgizilgen geologııalyq barlaý jumystarynyń esebin tanystyrdy, dep habarlaıdy QazAqparat.
Іzdeý jumystary memlekettik tapsyrys aıasynda júrgizildi. Tasty ýchaskesi boıynsha jobanyń jalpy quny 343 mln, al Saryadyr ýchaskesi boıynsha 399 mln teńgeni qurady.
«Alynǵan nátıjeler negizinde paıdaly qazbalardy ornalastyrýdyń bekitilgen zańdylyǵyn eskere otyryp, Tasty alańynda eki ýchaske bólinip alyndy. Onyń biri kolchedan-polımetalldy, tıtanmagnetıtti, ekinshisi altyn kendi. Qyzyltaý alańyndaǵy kolchedan-polımetalldy, tıtanmagnetıtti mıneraldy aımaǵy R1+R2 sanaty boıynsha boljamdy resýrstardyń mynadaı baǵa nátıjelerin kórsetti: ken - 106 mln tonna, qos totyqty tıtan - 2,7 mln, temir 9,7 mln tonna», - delingen ulttyq kompanııa taratqan aqparatta.
Soltústik Súmbe alańynda mys-altyn ken ornynda R3 sanatyndaǵy boljamdy resýrstardyń kólemi mynadaı: ken - 7,5 mln, mys - 8,3 myń, altyn - 1,7, kúmis - 3 tonna.
Saryadyr alańyndaǵy jumystar boıynsha mys-porfırli úlgidegi Almaty ýchaskesi anyqtaldy. Atalǵan ýchaskedegi R1 sanatyndaǵy boljamdy resýrstar mynalar: ken - 141 mln, mys - 311 myń, molıbden - 7 myń tonna.
