Qaraǵandy oblysynda Almaty-Ekaterınbor kúrejolynda 300 adam qaýipsiz jerge shyǵaryldy (FOTO)
QARAǴANDY. QazAqparat - Qaraǵandy oblysynda «Almaty-Ekaterınbor» avtojolynda qutqarý jumystary ótýde, dep habarlady aımaqtyq TJD baspasóz qyzmeti.
«Almaty-Ekaterınbor» avtojolynyń «Qaraǵandy-Aqsý-Aıýly» ýchaskesinde kúrdeli meteorologııalyq jaǵdaılarǵa baılanysty (burqasyn, kúshti jel, kóktaıǵaq) Qaraǵandy jáne Almaty baǵytynda jol tartqan júk jáne jeńil kólikter jáne jolaýshylar avtokólikteri kóptep jınalyp qaldy. Qazirgi kezde oblys TJD bólimsheleriniń, jergilikti atqarýshy organdardyń, jol qyzmetteriniń kúshterimen joldardy tazalaý jáne adamdardy qar qursaýynan shyǵarý jumystary júrgizilýde», - delingen habarlamada.
Vedomstvonyń aqparaty boıynsha, bul jumystarǵa 70-ten astam adam jáne 100-ge tarta tehnıka tartylǵan.
«Tehnıka jınalyp qalǵan jerde Qaraǵandy ákimdigi qar qursaýynda qalǵan adamdarǵa tamaq uıymdastyrdy. Qazirgi kezde 300 adam qaýipsiz jerge shyǵaryldy, 100 birlik tehnıka qar qursaýynan bosatyldy», - dep atap ótilgen habarlamada.
Balqashtan Qaraǵandyǵa qaraı kóliktiń barlyq túrleri úshin jol ashyldy.
«Aýa raıynyń nasharlaýyna, kórinimniń nashar bolýyna, burqasynǵa, kúshti qar jaýýyna baılanysty Qaraǵandy oblysynda negizgi baǵyttardaǵy joldarda avtokólik qozǵalysyna shekteý qoıyldy", dep málim etti TJD baspasóz qyzmeti.
