Qaraǵandy oblysynda alıment tóleýshilerdiń bereshegi 1,7 mlrd teńgeden asqan

QARAǴANDY. QazAqparat – Qaraǵandyda 22 myń balanyń ákesi 1,7 mlrd teńgeden astam alımentti tólemegen, dep habarlaıdy QazAqparat oblystyq prokýratýranyń baspasóz qyzmetine silteme jasap.

Búgin oblys prokýrory Baýyrjan Myrzakerovtiń tóraǵalyǵymen alıment óndirý máselesi boıynsha alqa otyrysy ótti. Oǵan óńir ákimi Ermaǵanbet Bólekpaev, sondaı-aq ýákiletti jáne múddeli organdardyń birinshi basshylary qatysty.

Oblys prokýrory málim etkendeı, óńirde alıment tóleýshilerdiń bereshegi 1,7 mlrd teńgeden asqan, bul – 22 myń balaǵa berilýi tıis qarajat.

Buǵan oryndaý organdarynyń basqa memlekettik organdarmen birlesip boryshkerlermen jumys isteý, olardy baqylaý, jumysqa ornalastyrý, sondaı-aq olarǵa ákimshilik jáne qylmystyq yqpal etý boıynsha ózara is-qımyldyń bolmaýy sebep retinde aıtyldy.

Qadaǵalaý vedomstvosy 86 boryshkerde elektrondyq ámııandardan, býkmekerlik kompanııalardan, baǵaly qaǵazdar bırjalarynan jáne taksı qyzmetterinen túsetin jasyryn kirister bar ekenin aıqyndady (36 mln teńge).

Prokýrorlar sot oryndaýshylarynyń áreketsizdiginen óndirip alynbaǵan 28 múlik obektisin, 300-den astam maldy jáne 22 arnaıy tehnıkany anyqtady. Munyń bári 89% jaǵdaıda múlikti ıelikten shyǵarýǵa ákelgen.

Alqa otyrysynda atalyp ótkendeı, boryshkerler izdeýge formaldy túrde jarııalanady, sebebi olar erkin júrip-turady, memlekettik qyzmetterdi paıdalanady jáne boryshker mártebesinde ekeni týraly habardar bolmaıdy.

Sondaı-aq, boryshkerlerdi qylmystyq jáne ákimshilik qýdalaý máseleleri qozǵaldy.

Oblys prokýratýrasy Ádilet mınıstriniń atyna qadaǵalaý aktisin joldady. Tabysyn jasyryp júrgen boryshkerlerge qatysty Qylmystyq kodekstiń 139-baby boıynsha qylmystyq is qozǵaý týraly másele sheshiletin boldy.

Alqa nátıjeleri boıynsha birqatar uıymdastyrýshylyq shara qabyldandy.

Atap aıtqanda, oblystyń barlyq óńirleride alımentpen jumys jónindegi vedomstvoaralyq toptar jáne Jumyspen qamtý ortalyqtarynyń bazasynda alımentshilerdi birinshi kezekte jumysqa ornalastyrý jónindegi bólimsheler (jumyspen qamtý ortalyǵy, kásipkerler palatasy, sot oryndaýshylarynyń palatasy, polıtsııa, ádilet organdary, balalar men bıznes sýbektileriniń quqyqtary jónindegi qoǵamdyq uıymdar) qurylady.