Qaraǵandy oblysynda alǵash ret qant júgerisin jınap jatyr
QARAǴANDY. QazAqparat - Qaraǵandy oblysynyń Abaı aýdanynda «Shans» sharýa qojalyǵy qant júgeri ósirýdi bastady. Alǵash ret bul dándi-daqyl 100 gektar jerge egildi, dep habarlaıdy óńir basshysynyń resmı saıty.
- Bul daqyl ósimdik jáne mal ósirýmen aınalysatyn bizdikindeı iri sharýa qojalyqtary úshin tıimdi. Qant júgerisi jem retinde keńinen qoldanylady. Odan súrlem men qurǵaq shóp óndiredi. Qant júgerisin biz stavropoldik ASh ǴZI ǵalymdarynyń keńesimen otyrǵyzdyq jáne de ol sheshimimiz úshin esh ókinbeımiz. Ónimdilik jaqsy bolady, - deıdi «Shans» sharýa qojalyǵynyń basshysy Igor Jabıak.
Qazirgi tańda jańa daqyldy jınaý naýqany bastaldy.
Sharýashylyqta búgingi kúni jemazyq zaýyty men 1000 basqa arnalǵan bordaqylaý alańynyń qurylysy júrgizilip jatyr.
Qaraǵandy oblysynda tórt aýdanda jaıylymdar boıynsha arnaıy baǵdarlama qurylǵan. Bul rette ǵalymdar aýyl sharýashylyǵy ónimderin óndirýshilerge sortańdalǵan jerge keletin kóp jyldyq shópterdiń tuqymdaryn paıdalanýdy usynyp otyr.
Aıta ketsek, qant júgerisi - kópsalaly dándi-daqyl, jem, azyq ónimderin jáne bıo otyn daıyndaýda paıdalanylýy múmkin. Bir gektar egistikten 220-250 ts sabaqsha bıomassasyn jáne 25-50 ts, keıde tipti 100 ts daqyl jınaýǵa bolady. Bul dándi-daqyl sabaqshalarynda qanttyń quramy joǵary bolǵandyqtan osylaı atalǵan.
