Qaraǵandy oblysynda áleýmettik áriptestik týraly jańa kelisimge qol qoıyldy

QARAǴANDY. QazAqparat – Qaraǵandy oblysynda oblys ákimdigi, kásipodaq jáne jumys berýshiler qaýymdastyǵynyń basshylary arasynda áleýmettik áriptestik týraly úshjaqty kelisim jasaldy, dep habarlaıdy QazAqparat tilshisi.

Bul qujat 2021-2023 jyldarǵa arnalǵan, ár úsh jyl saıyn jańartylyp otyrady. Bul joly jumyspen qamtýǵa, jumys oryndaryn saqtaýǵa, qyzmetkerlerdi áleýmettik qorǵaýǵa basa nazar aýdaryldy.

Pandemııa jaǵdaıynda atalmysh alǵysharttar birinshi orynǵa shyqty. Epıdemıologııalyq jaǵdaıǵa baılanysty kelisimge qol qoıý rásimi onlaın-rejımde ótti.

Jańa kelisimge qyzmetkerlerdi áleýmettik qorǵaý jáne kepildendirý, óndiristi qysqartý, kadrlardy kásibı daıarlaý jáne qaıta daıarlaý, eńbek qaýipsizdigi jáne eńbekti qorǵaý salasyndaǵy qoǵamdyq baqylaýdy qamtamasyz etý jáne basqa qosymsha tarmaqtar engizildi.

«Búgin qol qoıǵan bul qujat bizge eńbek jaǵdaıyn jaqsartýǵa kómektesedi. Bılik ekonomıkalyq turaqtylyqty saqtaýǵa odan ári yqpal etedi dep úmittenemin. Kásipodaqtardyń ujymdarda turaqty atmosfera qurýǵa, ratsıonalızatorlyqty damytýǵa, qyzmetkerlerdiń biliktiligin arttyrýǵa kómektesýin qalaımyn», - dep atap ótti taý-ken óndirý jáne taý-ken metallýrgııa kásiporyndary respýblıkalyq qaýymdastyǵynyń atqarýshy dırektory Nıkolaı Radostovets.

Qaraǵandy oblysy kásipodaq ortalyǵynyń tóraǵasy Bolat Jumabekovtyń aıtýynsha, buǵan deıingi kelisim aıasynda jas mamandarǵa áleýmettik qoldaý kórsetý máselesi keńeıe túsken.

Jańa qujatta jumysshy kásipteriniń ımıdjin arttyrýǵa basa nazar aýdaryldy.

Jeńis Qasymbek áleýmettik seriktesterge konstrýktıvtilik pen jaýapkershilik úshin alǵys aıtty.

«Shynynda da, bir ǵana jeńimpaz bolýy múmkin emes. Biz barlyq taraptardy barynsha qanaǵattandyratyn ortaq sheshim tabýymyz kerek. Qol qoıylǵan kelisim – bul biz qajet bolǵan jaǵdaıda ózgerister engize alatyn negizgi qujat ekeni túsinikti. Eńbek jáne áleýmettik qatynastarǵa áser etýi múmkin kóptegen aspektiler bar. Ótken jyly biz sizdermen, eń aldymen jumys berýshilermen birge pandemııa kezinde óte tyǵyz jumys jasadyq. Jumys oryndaryn saqtap qaldyq, sonymen qatar birqatar kásiporyndar jalaqysyn kóterdi», - dep esepteıdi óńir basshysy.

Áleýmettik áriptestik týraly osyndaı kelisimderge oblystyń barlyq qalalary men aýdandarynda qol qoıylady.