Qaraǵandy oblysynda alaıaqtarǵa jumys istegen kýrer ustaldy
Temirtaý qalalyq polıtsııa basqarmasyna qarasty Eskiqalalyq polıtsııa bólimine 5 tamyz kúni 75 jastaǵy zeınetker aryzben júgindi. Jábirlenýshige ózin polıtsııa qyzmetkerimin dep tanystyrǵan belgisiz bireý habarlasyp, qyzynyń jol-kólik oqıǵasyna ushyraǵanyn aıtqan. 50 jastaǵy qyzynyń kinási tolyq dáleldengenin aıtyp, ony qylmystyq jaýapkershilekten bosatý úshin aqsha talap etken. Keıin habarlasqan belgisiz adam telefon tutqasyn áıel adamǵa bergen. Onyń daýysy jábirlenýshiniń qyzynyń daýsyna uqsas bolǵan. Ne isterin bilmeı qalǵan jábirlenýshi úıinde jınaǵan 19 000 evro jáne 14 700 AQSh dollary baryn aıtqan. Sol kezde habarlasqan adam onyń úıine «kýrer» baratynyn aıtyp, eshqaıda shyqpaýyn eskertken.
Jedel áreketter barysynda Shahtınsk qalalyq polıtsııa bóliminiń qyzmetkerleri kúdiktini Astana qalasyndaǵy bankomattardyń birinde aqsha salyp jatqan jerinen ustady. Onyń 19 jastaǵy Taraz qalasynyń turǵyny ekeni anyqtaldy. Jigit aqshanyń qandaı jolmen kelip jatqanyn bilgen. Ustalǵan sátte kúdiktiden 17 800 evro jáne 115 000 teńge aqsha tárkilendi.
«Ókinishke oraı, alaıaqtyq týraly eskertýlerge qaramastan, aldanyp qalǵan adamdardan áli de aryzdar túsedi. Jyl basynan beri Qaraǵandy qalasynda «jol-kólik oqıǵasyna tústi jáne qylmystyq jaýapkershilikten bosatý úshin aqsha qajet» degen jeleýmen aldanyp qalý deregi boıynsha 80-nen astam aryz tirkeldi. Júrgizilgen keshendi jumystar barysynda osy isterge qatysy bar degen kúdikpen 27 adam ustalsa, onyń beseýi – kámelettik jasqa tolmaǵandar bolsa, 13-i – taksı júrgizýshileri. Eger de sizderge belgisiz adamdar habarlasyp, «balańyz nemese jaqyn týysyńyz jol-kólik oqıǵasyna tústi, jaýapkershilikten bosatý úshin aqsha qajet» degen qońyraýlar bolsa, birden telefon tutqasyn qoıyp, 102 arnasyna qońyraý soǵýlaryńyzdy suraımyn», - dedi Qaraǵandy oblystyq polıtsııa departamenti bastyǵynyń orynbasary Ábil Ábildın.
