Qaraǵandy oblysynda ál Farabıdi zertteýshilerdiń onlaın konferentsııasy ótti
Uly oıshyl Ábý Nasyr ál-Farabıdiń 1150 jyldyǵyn atap ótý – UNESCO-nyń ataýly kúnderi men oqıǵalarynyń kúntizbesine engen bolatyn. Memleket basshysy Qasym-Jomart Toqaevtyń bastamasymen Uly ustazdyń mereıtoıyna baǵyttalǵan sharalar elimizde keńinen nasıhattalýda. Oblys ákimdigi men akademık E.Bóketov atyndaǵy Qaraǵandy memlekettik ýnıversıtetiniń muryndyq bolýymen uıymdastyrylǵan halyqaralyq ǵylymı-tájirıbelik konferentsııa elimizdegi jáne álemdegi tótenshe jaǵdaıǵa baılanysty onlaında ótti. Onlaın jıynda alǵashqylardyń biri bolyp sóz alǵan oblys ákiminiń orynbasary Abzal Núkenov konferentsııaǵa qatysýshylardy quttyqtap, ǵalymdardyń jumysyna ǵylymı-shyǵarmashylyq tabys tiledi. Qazaq dalasynan shyqqan ǵulama ǵalymnyń eńbekteri bolashaqqa baǵdar jasaýymyzda baǵa jetpes qazyna ekenin tilge tıek etti.
Konferentsııanyń tizginin ustaǵan QarMÝ rektorynyń mindetin ýaqytsha atqarýshy, Ulttyq Akademııanyń korrespondent-múshesi, hımııa ǵylymdarynyń doktory, professor Erkebulan Tajbaev Ábý Nasyr ál-Farabı eńbekteri arqyly adamzat órkenıetiniń damýyna ólsheýsiz úles qosqanyn, eń iri ǵalym, fılosof jáne shyǵys arıstotelızminiń eń iri ókili atanǵanyn tilge tıek etti.
«QarMÝ ǵalymdary kópten beri Ábý Nasyr ál-Farabı shyǵarmashylyǵyn zerdelep, jan-jaqty zertteý jumystaryn júrgizip keledi. Baı shyǵarmashylyq jáne ǵylymı murasyna halyqtyń jáne jurtshylyqtyń nazaryn aýdarý – basty maqsatymyzǵa aınaldy. Árıne, fılosoftyń ǵylymı muralary búginde adamzattyń tuńǵıyq qazynasy. Áli aýdarylmaǵan pedagogıkalyq jáne psıhologııalyq qanshama eńbekteri, traktattary bar. Osyny eskere otyryp, joǵary oqý ornynda ǵylymı murasyn zertteý, ǵalymnyń ǵylymı materıaldary boıynsha biryńǵaı derekter bazasyn qurý – keler kúnniń enishisinde atqarylatyn jumystar qataryna engizildi.
1150 jyldyq mereıtoıyna arnalǵan «Zamanaýı qazaqstandyq kontekstegi ál-Farabı» atty halyqaralyq ǵylymı-tájirıbelik konferentsııamyzǵa Chehııa, Ózbekstan jáne alys-jaqyn shetelderdi qosqanda barlyǵy 160 ǵylymı maqala kelip tústi.
Uly ustazdyń jumystary máńgilik zertteýdi qajet etetin tarıhı jádiger ekenin jaqsy bilemiz. Ǵalymdarymyz zertteý eńbekterin aldaǵy ýaqytta stýdenttermen bólisip, keń aýqymda talqylaıdy degen senimdemin», –dedi Erkebulan Tajbaev.
Professor sondaı-aq, Uly ǵalymnyń shákirtteri Ábý Álı ıbn Sına men Ibn Rýshdtardyń Eýropadaǵy qaıta órleý mádenıetine áser etkenine keńinen toqtaldy.
Ǵalymdar ǵylymı zertteý jumystarynyń barysymen tanystyryp, ózekti oılaryn ortaǵa saldy. Ásirese konferentsııa jumysynda tarıh ǵylymdarynyń kandıdaty, Ortalyq Azııany zertteýler ortalyǵynyń dırektory Gúlnara Smaǵulova, fılosofııa ǵylymdarynyń doktory, professor Vladımır Batýrın Ábý Nasyr ál-Farabıdiń ǵylymı eńbekteriniń búgingi zamanaýı Qazaqstandyq ǵylymdy damytýǵa tıgizer paıdasyn erekshe atap ótti. Ǵylymı traktattaryn negizge alǵan ǵalymdar fılosoftyń jumystaryn zertteı otyryp, ǵylymı derekqoryn qurýdy usyndy.
Qashyqtan ótken jıynda fılologııa ǵylymdarynyń doktory, professor Berik Rahımov pen PhD doktory Dmıtrıı Afanasev baıandama jasap, ǵylymı turǵyda zerdelengen dáıektemelerin keltirip otyrdy.
Jalpy ǵalymdar arasyndaǵy onlaın konferentsııa pikirsaıys túrinde ótip, qatysýshylar suraqtaryn offlaın úlgisinde joldap otyrdy. Spıkerler ózderine joldanǵan suraqtardyń barlyǵyna ǵylymı negizde tuşymdy jaýap berdi.
Onlaın jıynda QarMÝ ǵalymdarynyń ǵylymı eńbekterinde Ál-Farabıdiń muralaryn tereńdetip zertteýdi qolǵa alyp, ony stýdentterge keńinen nasıhattaý sheshimi qabyldandy.
