Qaraǵandy oblysynda aqtútek boranda adasyp ketken shopan tabyldy
QARAǴANDY. QazAqparat –Balqash qalasynyń mańynda qutqarýshylar joǵalǵan er azamatty izdep tapty. Keshe kúndiz Qońyrat kentiniń janynda ornalasqan qystaqta boranǵa qaramastan malyn izdeýge ketken shopan joǵalyp ketken edi, dep habarlaıdy QazAqparat tilshisi.
15 qańtar saǵat 21:00-de Balqash qalasy Qońyrat kentiniń mańynda izdestirý-qutqarý jumysy júrgizildi. 1957 jyly týǵan er adamnyń týystary alańdaýshylyq bildirip, jedel jelige habarlasqan. Ol shamamen 14:00-de sharýa qojalyǵynan shyǵyp, malyn izdeýge attanǵan.
Іzdestirý jumystaryna Qaraǵandy oblysynyń TJD bólimsheleri jáne joǵalǵan adamnyń týystary atsalysty. Bul sharaǵa barlyǵy 15 adam men 5 tehnıka jumyldyryldy.
22:40-ta er adam sharýa qojalyǵynan 1,5 shaqyrym jerden tabylǵan. Túk kórinbeıtin aqtútek boran saldarynan er adam adasyp, qaıtar joldy taba almaı qalǵan. Qutqarýshylar shopannyń malymen birge úıine jetýine kómektesti.
Qutqarýshylar aýyldyq jerde turatyn halyqtyń aýa raıy nasharlaǵan kezde alys qashyqtyqqa jaıaý saıahatqa shyqpaýyn ótinedi.
