Qaraǵandy oblysynda ákimderdi saılaýǵa qatysty úsh pılottyq aımaq anyqtaldy
Qaraǵandy oblystyq máslıhatynyń kezekten tys, VI sessııasynda depýtattar tıisti qaýly qabyldady.
«Oblystyq máslıhattyń kezekten tys sessııasyn shaqyrýǵa Memleket basshysynyń 2023 jylǵy 1 qyrkúıektegi Qazaqstan halqyna Joldaýynda aıtylǵan aýdandar, oblystyq mańyzy bar qalalar ákimderiniń saılanýyn synaqtan ótkizý qajettigi týraly tapsyrmasy negiz boldy. Turaqty komıssııalardyń birlesken otyrysynyń qorytyndysy boıynsha pılottyq óńirler retinde depýtattyq korpýs Aqtoǵaı jáne Osakarov aýdandarynyń, sondaı-aq Prıozersk qalasynyń ákimderin saılaýdy usyndy», – dedi Qaraǵandy oblystyq máslıhatynyń tóraǵasy Núrken Qobjanov.
«QR saılaý týraly» Zańyna sáıkes 5 qarashada pılottyq óńirlerde saılaý ótkizý usynyldy.
Qaraǵandy oblystyq saılaý komıssııasynyń tóraǵasy Qaırat Núrkenov daıyndyq jumystary bastalatynyn habarlady. Onyń aıtýynsha, saılaýdy belgileý kelesi aptada júzege asyrylady dep josparlanǵan. Osydan keıin saılaý naýqany bastalady: kandıdattardy usyný, tirkeý jáne t. b.
Oblys ákiminiń orynbasary Baýyrjan Asanov zańnamaǵa sáıkes jergilikti atqarýshy organdar saılaý komıssııalaryna qajetti kómek kórsetetinin atap ótti.
Depýtattar qoǵamdy demokratııalandyrý boıynsha reformalardyń mańyzyn atap ótti.
«Búgingi tańda saıası protsesterdi damytýǵa óńirlik deńgeıde basa nazar aýdarylyp otyrǵany qýantady. Eger buryn ákimderdi janama quqyq negizinde máslıhat depýtattary tańdaǵan bolsa, endi turǵyndardyń ózderi saılaıtyn bolady. Bul quqyqty alǵash ret Prıozersk, Aqtoǵaı jáne Osakarov aýdandarynyń turǵyndary paıdalanady. Óıtkeni jergilikti halyq óz óńirin damytýǵa múddeli jáne qajettilikterdi jaqsy biledi», – dep túsindirdi oblystyq máslıhat depýtaty Seıfýl-Málik Qazıtov.
