Qaraǵandy oblysynda ákim orynbasary 4 mln teńge aıyppul tóleıdi

QARAǴANDY. QazAqparat - Qaraǵandyda alaıaqtyq jasady degen kúdikpen ustalǵan Álıhan Bókeıhan atyndaǵy aýdan ákiminiń orynbasaryna qatysty is tyńdaldy. Sot ony kináli dep tanydy, dep habarlaıdy QazAqparat tilshisi.

Qylmystyq is Qaraǵandy qalasynyń Oktıabr aýdandyq sotynda qaraldy. Belgili bolǵandaı, sottalýshy prokýrormen kinásin moıyndaý týraly is júrgizý kelisimin jasaǵan. Sondyqtan qylmystyq is kelisý satysynda qysqartylǵan tártippen qaraldy.

«Sottalýshy Qylmystyq kodekstiń («Memlekettik fýnktsııalardy oryndaýǵa ýákilettik berilgen adam jasaǵan alaıaqtyq») 190-baby 3-bóliginiń 2-tarmaǵy boıynsha qylmystyq quqyq buzýshylyq jasaǵany úshin kináli dep tanyldy. Oǵan 4 mıllıon teńge kóleminde aıyppul tóleý túrindegi jaza taǵaıyndaldy», - dep habarlady Oktıabr aýdandyq sotynan.

Esterińizge sala keteıik, Qaraǵandyda para aldy degen kúdikpen turǵyn úı-kommýnaldyq sharýashylyǵy máselelerine jetekshilik etken Álıhan Bókeıhan atyndaǵy aýdan ákiminiń orynbasary ustaldy. Ony ustaý týraly Qaraǵandy oblysy boıynsha Sybaılas jemqorlyqqa qarsy is-qımyl departamentiniń basshysy Murat Tóleýbaev habarlady.