Qaraǵandy oblysynda ákim maıorǵa para berdi
QARAǴANDY. QazAqparat - Qaraǵandy oblysy Jańaarqa aýdany jergilikti polıtsııa qyzmeti bastyǵynyń orynbasaryna aýyldyq okrýg ákiminen para alǵany úshin úsh jylǵa bas bostandyǵynan aıyrý úkimi shyqty.
Qylmystyq is materıaldaryna sáıkes osy jylǵy 12 sáýirde polıtsııa maıory Jańaarqa aýdanynda tas jolda Aınabulaq aýyldyq okrýginiń mas ákimin toqtatty. Ol ákimge narkodıspanserge aparmaı, ákimshilik jaýapkershilikke tartý hattamasyn toltyrmaǵany úshin 250 myń teńge tóleýdi usynǵan.
Óz kezeginde ákim aqsha ákelýge barmaqshy bolyp, sybaılas jemqorlyqqa qarsy vedomstvoǵa para bopsalaǵany týraly shaǵymmen júginedi. Maıor aqsha alyp jatqan kezde ustaldy. Laýazymdy tulǵa Qylmystyq kodekstiń 366-baby boıynsha aıypty dep tanyldy.
«Endi burynǵy jergilikti polıtsııa qyzmeti bastyǵynyń orynbasaryna onyń ózine jeke tıesili múlikteri tárkilene otyryp, memlekettik qyzmette, jergilikti ózin-ózi basqarý organdarynda, basqa da memlekettik qurylymdarda ómir boıyna jumys isteý quqyǵynan aıyra otyryp, úsh jylǵa bas bostandyǵynan aıyrý túrinde jaza taǵaıyndaldy», - degen úkimdi Jańaarqa aýdanynyń sýdıasy Bota Kárimova oqyp berdi.
Sottalýshy arnaıy maıor ataǵynan aıyryldy. Sonymen qatar aýyl ákimi taldaý jáne mas ekenine dárigerlerdiń qorytyndysyn alý túrindegi dálel jınaý ýaqyty ótip ketýine baılanysty ákimshilik jaýapkershilikke tartylǵan joq.
