Qaraǵandy oblysynda agroóndirýshilerge qarjylandyrýdyń jańa túri usynyldy

QARAǴANDY. QazAqparat – Qaraǵandy oblysynda aýyl sharýashylyǵy salasynda 14 iri ınvestıtsııalyq joba daıyndaldy. Olardy Soltústik Qazaqstan oblysyndaǵy agrobıznes pen memleket arasyndaǵy ózara is-qımylynyń úlgisinde iske asyrý josparlanýda.

Jobalardy qarjylandyrý sharttary týraly Qaraǵandy oblysynyń ákimi Ermaǵanbet Bólekpaevtyń Nura aýdanynyń aýylsharýashylyq ónimin óndirýshilerimen kezdesýinde aıtyldy.

«Aýyl sharýashylyǵy mınıstrligine oblysymyzdan 14 joba usynyldy. Іske asyrýǵa 37,6 mlrd teńge qajet bolady. Qarjylandyrý»Saryarqa«óńirlik ÁKK arqyly júzege asyrylady. Paıyzdyq mólsherleme jyldyq 4% aspaıdy. Merzimi – 8 jylǵa deıin, eki jyldyq dálizi bar. Kepil talap etilmeıdi. Jabdyq pen mal satyp alý ǵana qarjylandyrylady, olar kepilge qoıylady», – dedi Qaraǵandy oblysy Aýyl sharýashylyǵy basqarmasy basshysynyń óndiris jónindegi orynbasary Syrym Boshpanov.

Óńirde 11 sút-taýar fermasy salynady. Olardyń biri – Nura aýdanyndaǵy 800 bas iri qara maly bar sharýashylyq. Osynyń esebinen sút óńdeý kásiporyndary jumyspen qamtamasyz etilip, jańa jumys oryndary ashylady. Sonymen qatar ishki naryqta jergilikti óndirýshilerdiń taýarlary kóbirek bolady.

Budan bólek, Abaı aýdanynda kartop qoımasy men qus fabrıkasyn salýǵa qarajat bólinedi. Al Buqar Jyraý aýdanyndaǵy et baǵytyndaǵy qus fabrıkasy jańǵyrtylýda.