Qaraǵandy oblysynda adasyp ketken 5 adam qutqaryldy
QARAǴANDY. QazAqparat - Qaraǵandy oblysynda TJD qyzmetkerlerine joǵalyp ketken adamdardy tabý úshin eki izdestirý operatsııasyn uıymdastyrýǵa týra keldi, dep habarlaıdy óńir basshysynyń resmı saıty.
Abaı aýdanynyń Qaraǵandy aýyldyq okrýginde qutqarýshylar toby joǵalyp ketken balyqshylardy izdedi. Tórt er adam 20 qańtarda balyqqa shyǵyp, adasyp ketken. 21 qańtarda 16.55-te olar Sasyqkól kóliniń soltústik-shyǵysy jaǵyndada 2 shaqyrym qashyqtyqta tabyldy.
Ekinshi izdestirý-qutqarý operatsııasy Ulytaý aýdanynda uıymdastyryldy. 22 qańtarda saǵat tańǵy 4-te kezekshi pýltine qońyraý kelip tústi. Er adam qystaqtan shyǵyp, Jezdi kentine qaraı bet alǵanyn jáne dalada adasyp ketkenin habarlaǵan. Qutqarýshylar ony 8.55-te qystaqtan 10 shaqyrym qashyqtyqtan taýyp alǵan.
Barlyq qutqarylǵan adamdarǵa medıtsınalyq kómek qajet bolmady.
TJD qyzmetkerleri oblys turǵyndaryna balyq aýlaýǵa shyqqanda jaqyndaryńyzǵa qaı jerge baratynyńyzdy jáne qaı ýaqytta oralatynyńyzdy aıtyp ketý kerektigin eskertedi. Bul málimetter qandaı da bir oqıǵa kezinde izdestirý jumysyna septigin tıgizedi.
