Qaraǵandy oblysynda adasqan balyqshylar tabyldy
QARAǴANDY. QazAqparat - Qaraǵandy oblysynda qutqarýshylar Balqash kólinde baǵytynan jańylǵan balyqshylardy tapty, dep habarlaıdy QazAqparat tilshisi.
Jas jigitter qaıyǵy buzylǵandyqtan, jaǵalaýǵa jete almaı, aǵystyń ekpinimen kete barǵan.
«4 maýsym, dúısenbi kúni 22:35-te Qaraǵandy oblysynyń qutqarýshylaryna Balqash kólinde, jaǵalaýdan 15 shaqyrym qashyqtyqtaǵy eki balyqshy kómekke muqtaj ekendigi týraly habar keldi. 26 jáne 27 jastaǵy eki jigit motorly qaıyqpen balyq aýlaýǵa shyqqan. Biraq qaıyǵy buzylyp, jaǵalaýǵa jete almaǵan. Qaraǵandy oblystyq tótenshe jaǵdaılar departamentiniń jedel-qutqarý otrıadynyń qutqarýshylary kómekke bardy», - dep málimdedi departamenttiń baspasóz qyzmeti.
Abyroı bolǵanda, balyqshylardy qutqarýdyń sáti túsken, jigitter medıtsınalyq kómekke muqtaj emes.
